Гастроэнтеролог Наталья Мотилева ичак саломатлиги учун энг хавфли бўлган озиқ-овқат маҳсулотлари ҳақида огоҳлантирди. Мутахассиснинг таъкидлашича, ультра қайта ишланган маҳсулотлар инсон организми, хусусан, ошқозон-ичак тизими учун жиддий хавф туғдиради.
Шифокор айниқса колбаса, хот-дог ва жамбон каби гўшт маҳсулотларини ҳафтасига 500 граммдан ортиқ истеъмол қилишни тавсия этмайди. Бундай маҳсулотларни мунтазам ейиш йўғон ёки тўғри ичак шиллиқ қаватида хавфли ўсмалар, яъни колоректал саратон ривожланиш эҳтимолини сезиларли даражада оширади.
Шунингдек, фастфуд, чипс ва шакарли газланган ичимликлар ҳам ичак микрофлорасига салбий таъсир кўрсатади. Бундай маҳсулотлар ичакдаги фойдали бактериялар хилма-хиллигини камайтириб, овқат ҳазм қилиш жараёнини қийинлаштиради ва иммунитетни туширади. Натижада одамда турли яллиғланиш касалликлари келиб чиқиши мумкин.
Мотилеванинг сўзларига кўра, саноат усулида тайёрланган маҳсулотлар таркибидаги эмульгаторлар диареяни келтириб чиқарса, ортиқча туз ва шакар моддалари танада шиш пайдо бўлишига сабаб бўлади. Бундан ташқари, таркибида кўп миқдорда фруктоза бўлган маҳсулотлар ичак ҳаракатини бузиб, қорин дам бўлиши ва оғриқларни юзага келтиради. Шифокор соғлом бўлиш учун табиий ва кам қайта ишланган маҳсулотларга устунлик беришни маслаҳат беради.
“Zamin”ни Telegram'да ўқинг!
