Lukashenko hozir MDHdagi asosiy odam kim ekanini aytdi

^{Foto: «president.gov.by»}
Belarus prezidenti Aleksandr Lukashenko Tojikiston rahbari Emomali Rahmonni Mustaqil Davlatlar Hamdoʻstligi (MDH)dagi eng asosiy odam deb atadi. Bu haqda Lukashenko Dushanbega ishchi tashrifi chogʻida boʻlib oʻtgan muzokaralarda ma'lum qildi.

Muzokaralar va undan keyin ommaviy axborot vositalari uchun oʻtkazilgan brifingda Lukashenko va Rahmon Belarus va Tojikiston oʻrtasidagi oʻzaro hamkorlik haqida gapirdi. Lukashenko Minsk Dushanbega yordam berishga tayyorligini ta'kidladi hamda bu samarali muzokaralar mamlakatlar oʻrtasidagi ikki tomonlama munosabatlarni rivojlantirishga qoʻshimcha turtki berishiga ishonch bildirdi.

Lukashenko, shuningdek, Rahmon bilan oʻn yildan koʻproq vaqt davomida birga ishlayotganini ta'kidladi va shuning uchun oʻzlarini «oqsoqollar» deb hisoblashini aytdi. Lukashenko Rahmonga murojaat qilib, uni MDHdagi eng asosiy shaxs deb atadi.

pic.twitter.com/yWKveTISIj

— Shuxrat Razzakov (@ShuhratRazzakov) October 12, 2022

"Siz oqsoqolsiz. Hozir MDHdagi eng asosiy odamsiz. Buni hammamiz tan olamiz. Men siz bilan birgaman", — dedi u va shu sababdan MDH rivojida koʻp narsa unga va Rahmonga bogʻliqligini qoʻshimcha qildi.

Aleksandr Lukashenko Tojikiston Oliy Majlisi Vakillar palatasi raisi Mahmadtoir Zokirzoda bilan ham uchrashdi va suhbat davomida Rahmonni nega hurmat qilishini aytdi.

- "Bosib oʻtilgan yoʻl oson boʻlmadi. Kecha men unga aytdim: Biz shuncha vaqt birga ishladik, lekin biror marta keskin gapirganimizni, janjallashganimizni, hatto bahslashganimizni eslay olmayman. Bizda barcha masalalarda hamisha yagona pozitsiya boʻlgan. Har doim bir-birimizni qoʻllab-quvvatlab kelganmiz. Bu doʻst boʻlganimiz uchun emas. Mutlaqo hamfikr ekanligimiz uchun. Men uchun u hamisha oʻz vataniga sadoqat va fidoyilik namunasi boʻlib kelgan", — dedi Belarus rahbari.

Aleksandr Lukashenko shuningdek, ikki davlat munosabatlaridagi muvaffaqiyatlar haqida gapirdi.

- "Xalqlarimiz bir-biriga oʻxshash. Hattoki, ular bir-biridan farq qilmaydi, degan boʻlardim: ular mehribon, mehnatkash, iste'dodli xalqlar. Va bu borada munosabatlarimizda muayyan muvaffaqiyatlar bor", — dedi Aleksandr Lukashenko. “Zamin” yangiliklarini “Telegram”da kuzatib boring