Ukrainalik mahalliy deputat Mukachevskiy tumanidagi Keretskovskiy qishloq kengashi sessiyasi vaqtida zalga kirib bir nechta granatani portlatib yubordi. Oqibatda 26 kishi yaralangan, 6 kishining ahvoli og‘ir.
Avvaliga granata portlatgan deputat halok bo‘lgani aytilgandi, lekin keyinchalik u omon qolgani, shifokorlar jonlantirish bo‘limida hayotini saqlab qolishga urinayotgani ma’lum bo‘ldi.
Ukrain nashrlariga ko‘ra, Keretskovskiy qishloq kengashi deputati prezident Zelenskiy yetakchiligidagi «Sluga naroda» partiyasi vakili Sergey Batrik bo‘lgan. Granata portlatilgan yig‘ilishda 2024 yil uchun budjet loyihasi muhokama qilingan.
Karpat ortidagi granata portlatish hodisasi Ukraina milliy politsiyasi tomonidan terrorchilik akti deb qayd etilgan. Milliy politsiya vakiliga ko‘ra, deputat tirik qolsa, 10 yilgacha qamalishi mumkin. Guvohlarning aytishicha, deputat yig‘ilish boshidan boshqa deputatlar bilan tortishgan. U avvaliga 2023 yil budjeti haqida hisobot berishlarini, keyin yangi yil uchun budjetni qabul qilishni so‘ragan.
Sergey Batrik zaldan chiqqach 2 daqiqa 40 soniyaga tashqariga chiqqan, qaytib kirgan va xotirjam holatda granata portlatgan. Guvohlar u bilan birga yana bir deputat tashqariga chiqqani va qaytib kirmaganini aytgan.
