Saudiyalik bloger O‘zbekiston sayyohlik salohiyatini targ‘ib qiladi

^{Foto: “Dunyo” agentligi}
O‘zbekistonning Saudiya Arabistonidagi elchisi Nodirjon Turg‘unov Saudi Travel Market kompaniyasi vakili va taniqli bloger Siham al-Mas’ud bilan uchrashuv o‘tkazdi. Bu haqda “Dunyo” agentligi xabar berdi.

Qayd etilishicha, uchrashuvda O‘zbekiston va Saudiya Arabistoni o‘rtasida turizm yo‘nalishida hamkorlik aloqalarini jadallashtirish, O‘zbekistonga kelayotgan sayyohlar sonini oshirish, ikki davlatda mazkur yo‘nalishda o‘tkaziladigan yirik tadbirlarda soha vakillarining ishtirokini ta’minlash masalalari muhokama qilingan.

Siham al-Mas’ud O‘zbekiston dunyodagi asosiy turizm maskanlaridan biri ekanini e’tirof etib, Saudiya turkompaniyalari o‘zbek tomoni bilan hamkorlik o‘rnatishga tayyorligini bildirgan. U, shuningdek, blogerlik faoliyati bilan shug‘ullanishini ham aytib o‘tgan va Instagram sahifasida 100 ming, Snapchat ijtimoiy tarmog‘ida 22 ming hamda Google map'da 4 millionga yaqin obunachisi borligini ma’lum qilgan.

"Ularda, asosan, saudiyalik sayyohlar tashrif buyurayotgan mamlakatning tarixi, madaniyati, milliy taomlari, bozorlari va mehmonxonalar haqidagi muhim ma’lumotlar e’lon qilib boriladi", — deydi u.

Uchrashuv yakunida Saudi Travel Market kompaniyasi vakilining O‘zbekistonga safarini tashkil etish va mamlakat sayyohlik salohiyatiga bag‘ishlangan tadbirlarni birgalikda tashkil etish to‘g‘risida kelishib olingan.

Yangiliklar