Ispaniya yana 10 ta Leopard 2A4 tankini Ukrainaga topshirdi

^{Foto: Courtesy Canadian Armed Forces/REUTERS}
Ispaniya Ukrainaga yana 10 ta Leopard 2A4 tankini jo‘natdi, deb xabar qildi qirollik mudofaa vazirligi 15 iyul, dushanba kuni. Xabarda ta’kidlanganidek, jangovar mashinalar Alkala-de-Gvadayra shahrida kapital ta’mirdan chiqarilib, sinovdan o‘tkazildi. Tanklardan tashqari Ispaniya «bir nechta izli ekskavatorlar va sezilarli miqdordagi tankka qarshi raketalarni» topshirmoqda.

Ukraina uchun harbiy yuk 13 iyul kuni Ispaniya shimolidagi Ferrol portidan jo‘nab ketdi. Kelgusi hafta oxirigacha u Polshaga yetib borishi va u yerdan quruqlik transportida Ukraina hududiga olib ketilishi kutilmoqda.

Shu tariqa, Madrid Kiyevga 20 ta Leopard tankini topshirdi, deya qayd etdi Ispaniya mudofaa vazirligi. 2024 yilning ikkinchi yarmida Leopard'ning yana bir partiyasini Ukrainaga o‘tkazish rejalashtirilgan, deya qo‘shimcha qildi idora.

Madrid Kiyevga 1 milliard yevrolik qurollarni topshiradi

May oyi oxirida Ukraina prezidenti Volodimir Zelenskiy va Ispaniya bosh vaziri Pedro Sanches Ispaniya va Ukraina o‘rtasida xavfsizlik kafolatlari bo‘yicha ikki tomonlama kelishuvni imzoladilar. Hujjat, xususan, joriy yilda Ukrainaga Ispaniyadan umumiy qiymati 1 milliard yevrolik qurol-yarog‘ va harbiy texnika berishni nazarda tutadi.

El Pais ma’lumotlariga ko‘ra, ushbu paketning bir qismi sifatida Ukraina Patriot havo mudofaa tizimi uchun zenit-raketalar, 19 ta ishlatilgan Leopard 2A4 tanklari va o‘q-dorilarni olishi kerak. “Zamin” yangiliklarini “Telegram”da kuzatib boring