Adabiyot boʻyicha Nobel mukofoti yozuvchi Xan Ganga berildi

^{Foto: Getty Images}
Nobel qoʻmitasi adabiyot boʻyicha 2024 yilgi mukofot laureatini e'lon qildi. Mukofotga janubiy koreyalik Han Kang loyiq koʻrildi. Uning asarlari «tarixiy jarohatlarga qarshi kurashadigan va inson hayotining nozikligini aks ettiruvchi kuchli she'riy nasr» sifatida e'tirof etildi.

Han Kang 2016 yilda «Vegetarian» romani uchun Xalqaro Buker mukofotini qoʻlga kiritgandi.

Han Kang 1970 yilda yozuvchi Xan Sinvon oilasida dunyoga kelgan. U oʻzining yozuvchilik karerasini she'rlaridan biri «Jamiyat va adabiyot» jurnalida chop etilganidan keyin boshlagan. Uning rasmiy debyuti oradan bir yil oʻtgach «Alvon langar» hikoyasi uchun Seul Sinmun adabiyot tanlovida gʻoliblikni qoʻlga kiritish bilan boshlangan.

Han Kang 2021 yilda «Men vidolashmayman» romanini chop etgan — unda uch nafar ayol nomidan Chejudo orolidagi isyon haqida hikoya qilinadi.

7 oktyabr kuni Nobel haftaligiga start berildi. Birinchi boʻlib, fiziologiya va tibbiyot boʻyicha mukofot egalarining nomi e'lon qilindi. Amerikalik olimlar Viktor Ambros va Geri Ravkan mikroRNKni kashf qilgani uchun bu yilgi mukofot bilan taqdirlandi.

Fizika boʻyicha mukofot esa Jon Xopfild va Jeffri Xintonga nasib etdi — ularga mukofot «sun'iy neyron tarmoqlari yordamida Machine Learningʼning asosini tashkil etuvchi fundamental kashfiyotlar va ixtirolar uchun» beriladi.

10 oktyabrda esa adabiyot boʻyicha Nobel mukofoti gʻoliblarining nomlari ma'lum boʻladi. 11 oktyabr kuni Osloda tinchlik mukofoti sovrindori e'lon qilinadi, 14 oktyabrda esa iqtisodiyot boʻyicha mukofot gʻolibi aniqlanadi. Nobel mukofotining har bir kategoriyasi uchun 11 million shved kronasi taqdim etiladi. Bu bir million dollardan biroz koʻproq. “Zamin” yangiliklarini “Telegram”da kuzatib boring