AQSHda 10 yoshli bola politsiyaga qo‘ng‘iroq qilib, matematikadan uy vazifasini bajarishda yordam so‘radi

Amerikaning Viskonsin shtatida yashovchi o‘n yoshli maktab o‘quvchisi matematika fani bo‘yicha uy vazifasini bajara olmagach, 911 raqamiga qo‘ng‘iroq qildi va politsiyadan yordam so‘radi.

^{Foto: Shawano County Sheriff's Office}
Dispetcher Kim Krauzga murojaat qilgan bolaning so‘zlariga ko‘ra, uning oilasida hech kim “matematikani yaxshi bilmaydi”. Shu sababli politsiyadan yordam so‘rashga qaror qilgan.

Dispetcher matematikadan berilgan masalani eshitar ekan, topshiriqni telefon orqali yecha olmasligini tushungan va bolaga yordam berish uchun politsiyachi yuborishga qaror qilgan.

^{Cheyz Meyson
Foto: Shawano County Sheriff's Office}
Ma’lum vaqtdan so‘ng politsiya xodimi — mahalliy sherifning o‘rinbosari Cheyz Meyson bola yashaydigan uyga yetib kelgan va u ham “matematikani yaxshi bilmasligini” tan olgan. Shunga qaramay, u bolaga yordam berishga rozi bo‘lgan va ular birgalikda o‘nli kasrlarni bo‘lish mavzusidagi misollarni yechgan.

Shundan so‘ng Meyson bolaga shaxsiy tashrif qog‘ozini berib, agar hayotiga hech narsa tahdid solmasa va o‘qish bo‘yicha yana yordam kerak bo‘lsa, favqulodda shoshilinch raqamiga emas, balki shu telefonga qo‘ng‘iroq qilish kerakligini tushuntirgan.

Shunga o‘xshash voqea 2019 yilda AQSHning Lafayett shahrida sodir bo‘lgan. Besh yil avval yosh maktab o‘quvchisi matematikadan uy vazifasini bajara olmagach, 911 raqamiga qo‘ng‘iroq qilgan edi. “Zamin” yangiliklarini “Telegram”da kuzatib boring