Azerbaijan Airlines samolyoti Rossiyaning «Pantsir-S» tizimi bilan urib tushirilgan(mi?)

^{Foto: Reuters}
Reuters agentligining Ozarboyjondagi tergov jarayonidan xabardor boʻlgan toʻrt manbasi Azerbaijan Airlines aviakompaniyasining Qozogʻiston hududiga qulagan samolyoti Rossiya havo hujumidan mudofaa tizimi zarbasiga duchor boʻlganini tasdiqladi.

Agentlik suhbatdoshlaridan biri dastlabki ma'lumotlar samolyot Rossiyaning «Pantsir-S» zenit raketa-toʻp kompleksi (ZRPK) orqali urib tushirilgani, Grozniy atrofida radioelektron kurash tizimlari ishga tushirilgani tufayli laynerda aloqa «falaj holatga» kelganini koʻrsatmoqda.

«Hech kim buni ataylab qilingan deya olmaydi. Ammo, aniqlangan faktlarni hisobga olgan holda, Boku Rossiya tomoni Ozarboyjon samolyotini urib tushirganini tan olishini kutmoqda», — degan u.

Avvalroq Azerbaijan Airlines samolyoti halokatiga Rossiya raketasi sabab boʻlgani haqida Euronews telekanali ham Ozarboyjon hukumatidagi manbalariga asoslangan holda xabar bergandi. Nashr suhbatdoshlarining soʻzlariga koʻra, Grozniy ustida «dronlar faolligi kuzatilayotgan» vaqtda Bokudan ushbu shaharga 8432-reysni amalga oshirgan samolyot tomon raketa uchirilgan. Raketa samolyot yaqinida portlab, uning qoplamasiga zarar etkazgan.

Shundan keyin samolyotga Rossiya aeroportlaridan biriga avariyaviy qoʻnishni amalga oshirishga ruxsat berilmagan va u Kaspiy dengizi orqali Oqtov yoʻnalishida uchishga yoʻnaltirilgan.

Ozarboyjondagi Caliber.Az nashri ham «hukumatdagi ishonchli manbar»ga koʻra, Grozniyga uchib borgan samolyot Rossiyaning «Pantsir-S» havo hujumidan mudofaa tizimi orqali oʻqqa tutilgani haqida xabar bergandi.

Azerbaijan Airlines aviakompaniyasining Bokudan Grozniyga uchgan samolyoti 25 dekabr tongida Oqtov yaqinida qulab tushdi. Bortda 62 yoʻlovchi hamda ekipajning besh nafar a'zosi boʻlgan. Aviahalokat 38 kishi umriga zomin boʻlgan, 29 kishi omon qolgan.

Samolyot Rossiya havo hujumidan mudofaa tizimlari orqali urib tushirilgan boʻlishi mumkinligi haqidagi versiya layner parchalari aks etgan videolar paydo boʻlishi bilan bildirilgandi. Videolarda samolyot fyuzelajida zenit raketaning shikastlovchi elementlariga xos izlar qolgan.

Kremldagilar Qozogʻistondagi aviahalokat sabablari boʻyicha «gipoteza qurish»dan bosh tortgan. Qozogʻiston rasmiylari aviahalokat sabablari yuzasidan rasmiy versiyaga ega emasligi va tekshiruvlar davom etayotganida samolyot halokati boʻyicha qandaydir versiyani na tasdiqlay va na rad eta olishini bildirgan. “Zamin” yangiliklarini “Telegram”da kuzatib boring