Nima uchun Los-Anjeles yonmoqda?

2025 yilning yanvar oyida Los-Anjeles va janubiy Kaliforniya hududini qamrab olgan yongʻinlar AQSh tarixidagi eng xavfli va zararli tabiiy ofatlardan biriga aylandi. 10 kishi halok boʻldi, 180 mingga yaqin aholi evakuatsiya qilindi. Yongʻinlar mashhur Hollywood belgisiga, Sunset bulvari va Alleye Slavi kabi joylarga tahdid solmoqda.

Mutahassislar bir nechta omillar bu yongʻinlarning keng koʻlamli boʻlishiga sabab boʻlganini ta'kidlamoqda:

Quruq iqlim va kuchli qurgʻoqchilik

Kaliforniyada hozirda yomgʻir mavsumi boʻlishi kerak edi, biroq 2024 yil davomida yomgʻir deyarli yogʻmadi. 2022–2023 yillardagi kuchli yogʻingarchiliklar natijasida oʻsimliklar va daraxtlar tez oʻsgan boʻlsa, keyinchalik quruq havo bu oʻsimliklarni tez quritib, yongʻinlar uchun oson yonuvchi yoqilgʻiga aylantirdi.

Shamolning ta'siri

Santa-Ana deb ataluvchi kuchli shamollar yongʻinlarning tez tarqalishiga sabab boʻlmoqda. Ushbu shamol 45 metr/sekundgacha tezlikka ega boʻlib, shaharga quruq va issiq havo olib keladi. Shamolning toʻxtamasligi yongʻinlarni nazoratga olishni qiyinlashtirmoqda.

Yongʻin xizmati muammolari

Los-Anjeles shahar yongʻin xizmati yongʻinlarga toʻliq tayyor emasligi tanqid qilinmoqda. Garchi 2025 yil uchun byudjet oshirilgan boʻlsa-da, koʻp yillik muammolar va infratuzilmaning eski holati yongʻinlarga qarshi kurashni qiyinlashtirgan.

Shahar meri va boshqa rasmiylar vaziyatni nazoratga olish uchun qoʻshimcha choralar koʻrmoqda. Shu bilan birga, iqlim oʻzgarishi kabi global omillar ham bunday ofatlarning kelajakda koʻproq uchrashiga olib kelishi mumkinligi ta'kidlanmoqda. “Zamin” yangiliklarini “Telegram”da kuzatib boring