Bill Geyts farzandlariga meros qoldirmaydi — milliardlar kimga ketadi?

Dunyodagi eng mashhur va ta’sirli milliarderlardan biri — Bill Geyts o‘z merosi haqidagi qarorini e’lon qildi. Unga ko‘ra, uch nafar farzandi — Jennifer, Rori va Fibi jami boyligining atigi 1 foizidan kamrog‘inigina oladi.

Forbes ma’lumotiga ko‘ra, Microsoft asoschisining boyligi hozirda 101 milliard dollardan ortiq. Ammo Geyts bu mablag‘larning asosiy qismini farzandlariga emas, insoniyatga foyda keltiradigan loyihalarga yo‘naltirish niyatida.

“Sulola yaratish niyatim yo‘q” — Geytsning pozitsiyasi

Hindistonlik podkastchi Raju Shamani bilan suhbatda Bill Geyts shunday dedi:

“Farzandlarimga ajoyib bolalik va ta’lim imkoniyatlarini yaratdim. Ammo ular boyligimning 1 foizdan kam qismini olishadi, chunki bu ular uchun yaxshilik bo‘lmasligini anglab yetdim. Men sulola yaratishni istamayman. Men ulardan Microsoft'ni boshqarishni so‘raganim yo‘q.”

Maqsad — boylikni insoniyatga xizmat qildirish

Geytsning asosiy e’tibori Gates Foundation jamg‘armasiga qaratiladi. U 2000 yilda sobiq turmush o‘rtog‘i Melinda bilan birga tashkil etgan bu jamg‘arma hozirda dunyodagi eng yirik xususiy xayriya tashkilotlaridan biri hisoblanadi.

Faoliyat yo‘nalishlari — sog‘liqni saqlash, ta’lim va qashshoqlikni kamaytirish. Jamg‘arma Afrika va Osiyo davlatlaridagi minglab insonlar hayotini yaxshilashga hissa qo‘shmoqda.

“Muhimi — mehr va tushunish”

Bill Geyts farzandlarining moliyaviy jihatdan cheksiz imkoniyatlarga emas, balki insoniy qadriyatlarga tayanishini istaydi:

“Bolalar sizning muhabbatingiz va qo‘llab-quvvatlovingizga shubha qilmasligi kerak. Shuning uchun ularga yoshlikdan o‘z falsafangizni tushuntiring: siz ularga teng imkoniyat berasiz, lekin katta pullar ehtiyojmandlarga yo‘naltiriladi.”

Geyts ta’kidlashicha, farzandlari bu qarorni to‘liq tushunadi va qo‘llab-quvvatlaydi.

Bill Geytsning harakati butun dunyodagi boy insonlar uchun o‘rnak bo‘lishi mumkin. Uning falsafasi oddiy: boylik — bu maqsad emas, vosita. Agar u dunyodagi hayotni yaxshilashga xizmat qilsa, ana shunda uning haqiqiy qiymati yuzaga chiqadi. “Zamin”ni Telegramʻda oʻqing!