Xitoyda samolyot yo‘lovchisi «toza havo» istab avariyaviy eshikni ochib yubordi

Xitoyning Yunnan provinsiyasida China Eastern Airlines aviakompaniyasiga tegishli samolyot yo‘lovchisi noodatiy harakat bilan hammani lol qoldirdi. Bu haqda Need to Know nashri xabar tarqatgan.

Hodisa 12 may kuni sodir bo‘lgan. Samolyot yerga qo‘nish jarayonini yakunlagan va qo‘nish yo‘lagida harakatlanayotgan paytda, yo‘lovchilardan biri kutilmaganda avariyaviy eshikni ochib yuborgan. Ma’lum bo‘lishicha, erkak bu harakatini «toza havodan nafas olish» istagi bilan izohlagan. U avariyaviy chiqishning tutqichini tortib, evakuatsiya uchun mo‘ljallangan trapning ochilishiga sabab bo‘lgan.

Holatdan hayratga tushgan boshqa yo‘lovchilar orasida vahima boshlangan. Ekipaj xodimlari vaziyatni bartaraf qilishga uringan, biroq bu voqea tufayli samolyotning yo‘lovchilarni tushirish jarayoni taxminan 20 daqiqaga kechikkan.

Hodisa joyiga politsiya chaqirilgan va qoidabuzar yo‘lovchi politsiya xodimlari tomonidan ushlanib, hibsga olingan. Hozirgi vaqtda bu shaxs 100 mingdan 200 ming yuangacha (taxminan 27,7 ming AQSH dollarigacha) jarimaga tortilishi mumkinligi ma’lum qilindi.

Aviatsiya sohasi ekspertlari avariyaviy eshiklarning bu tarzda ochilishi havo kemasi xavfsizligi uchun jiddiy tahdid bo‘lishi mumkinligini ta’kidlashdi. Shuningdek, yo‘lovchilarning bunday xatti-harakati jinoiy javobgarlikka sabab bo‘lishi mumkinligi yana bir bor eslatib o‘tildi.

China Eastern Airlines aviakompaniyasi ushbu voqeadan keyin yo‘lovchilar xavfsizligini yanada mustahkamlash maqsadida tushuntirish ishlarini kuchaytirishini bildirdi. Shuningdek, aviakompaniya boshqa yo‘lovchilardan bunday noqonuniy harakatlarga yo‘l qo‘ymaslik va havo kemasidagi xavfsizlik qoidalariga qat’iy rioya qilishni so‘rab qolgan. “Zamin”ni Telegramʻda oʻqing!