Janubiy Koreyada siyosiy maydon yana shiddat bilan qizib bormoqda. Mamlakatning sobiq prezidenti Yun Sok Yolga nisbatan yanada jiddiy chora ko‘rildi — Seul shahri sudi uni ikkinchi marta hibsga olish haqida qaror chiqardi, deb xabar berdi Yonhap agentligi.
Bu qaror mamlakatda shov-shuvli harbiy holat ishi bo‘yicha qabul qilindi. 2024 yil dekabrida Yun Sok Yol mamlakatda harbiy holat joriy etgan edi va bu holat nafaqat parlament, balki jamoatchilik tomonidan ham qattiq tanqid qilingan. Natijada, u impichmentga uchradi va 2025 yil yanvar oyida hibsga olindi. Ammo, mart oyida sud uni hibsdan ozod etgandi.
Lekin tergov tugamadi. 2025 yil 6 iyul kuni Janubiy Koreya maxsus prokuraturasi suddan yana order so‘radi va bu safar beshta jiddiy ayblov ilgari surildi. Ular orasida Vazirlar Mahkamasi a’zolarining vakolatlarini chetlab o‘tish, rasmiy hujjatlarni soxtalashtirish va harbiy holat haqida yolg‘on axborot tarqatish kabi holatlar mavjud.
Ayblovlar juda og‘ir. Maxsus prokurorlar fikricha, Yun Sok Yol mamlakatda konstitutsiyaviy tuzumni buzishga urinish orqali qonunni toptagan. Sudya esa uning dalillarni yo‘q qilish ehtimoli yuqori ekanini ta’kidlab, hibs orderini berdi.
Ayni paytda sobiq prezident Seuldagi qamoqxonada saqlanmoqda va u sudning keyingi qarorini kutmoqda. Unga nisbatan isyon va boshqa og‘ir ayblovlar bilan bog‘liq ish ko‘rib chiqilishda davom etyapti.
Yun Sok Yol va uning himoyachilari esa ayblovlarni rad etib, bu ishni siyosiy qatag‘on sifatida baholamoqda. Biroq sud organlari va maxsus tergovchilar ishga jiddiy yondashmoqda. Yaqin haftalarda bu masala yana yurt va xalqaro siyosiy maydonda eng muhokamali mavzulardan biriga aylanishi kutilmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
