O‘zbekiston Tashqi ishlar vazirligi, Mazoriy Sharifda Alisher Navoiy haykali buzilgani haqidagi xabarlardan so‘ng Afg‘oniston rasmiylari bilan bog‘landi, deb Kursiv.uz xabar berdi. Vazirlik ushbu holat yuzasidan rasmiy bayonot berdi.
Ma’lumotlarga ko‘ra, haykal joylashgan hudud buyuk mutafakkir xotirasiga mos kelmagani sababli, mahalliy hokimiyat uni buzib tashlagan. Bu yerda shoir va mutafakkir uchun yanada chiroyli majmua qurilishi rejalashtirilgan.
Afg‘oniston Madaniyat vazirligi bilan bu ishlar kelishilmagan. Kobul voqeadan afsusda ekanini bildirgan va Navoiyning sharafiga yangi haykal hamda unga atalgan maydon barpo etilishini ma’lum qilgan.
Afg‘on tomoni buyuk mutafakkir xotirasini saqlashga sodiqligini bildirgan va uning nomini munosib tarzda e’zozlash uchun barcha choralar ko‘rilishini ta’kidlagan.
Eslatib o‘tamiz, Tolibon hokimiyatga kelganidan keyin Afg‘onistonda Navoiyga oid bir nechta obidalar shikastlangan. 2023 yilda barelyef va grafitiga zarar yetkazilgan, O‘zbekiston TIV esa bu holatdan afsus bildirgan edi.
“Zamin”ni Telegramʻda oʻqing!
