IPC — BMTning global ochlikni kuzatish tizimi — G‘azo shahri va uning atrofida rasmiy ocharchilik boshlanganini ma’lum qildi, deb Kursiv.media xabar berdi.
Ta’kidlanishicha, hozirda 514 ming kishi yoki aholining taxminan to‘rtinchi qismi ocharchilikdan aziyat chekmoqda. Sentyabr oyining oxiriga kelib, bu raqam 641 ming kishiga yetishi mumkin.
BMTning insonparvarlik ishlari bo‘yicha rahbari Tom Fletcher bu fojiani oldini olish mumkin bo‘lganini, biroq Isroil tomonidan yaratilayotgan tizimli to‘siqlar sababli oziq-ovqat yordamlari chegaralarda to‘xtab qolayotganini aytdi. Isroil esa bu hisobotni “yolg‘on va tarafkashlik” deb rad etdi.
BMT Bosh kotibi Antoniu Guterrish G‘azodagi ocharchilikni “insoniyat uchun fojia” deb atadi va zudlik bilan o‘t ochishni to‘xtatish hamda insonparvarlik yordamlarini bemalol yetkazishga chaqirdi.
Ma’lumot uchun, bu IPC tomonidan Afrikadan tashqarida qayd etilgan birinchi ocharchilik bo‘lib, vaziyat Deir al-Balah va Xon Yunis hududlariga ham yoyilishi mumkin.
“Zamin”ni Telegramʻda oʻqing!
