Singapur yana bir bor dunyo miqyosida xavfsizlik jihatidan yetakchi davlat sifatida e’tirof etildi. “Sinxua” agentligi tarqatgan ma’lumotga ko‘ra, mamlakat 2006-yildan buyon 12-marta Gellap institutining Global xavfsizlik hisobotida birinchi o‘rinni qo‘lga kiritdi.
Hisobotda qayd etilishicha, 2024-yilda singapurliklarning 98 foizi kechki payt yoki tunda yolg‘iz ko‘chada yurganda o‘zini mutlaqo xavfsiz his qilgan. Bu esa dunyo bo‘yicha eng yuqori ko‘rsatkichlardan biri sifatida qayd etildi. Shundan ko‘rinib turibdiki, Singapur uzoq yillar davomida xavfsizlik darajasini yuqori bosqichda saqlab kelayotgan.
So‘rov natijalari shuni ko‘rsatdiki, xavfsizlik hissi jinslar o‘rtasida deyarli farq qilmagan. 2024-yilda erkaklarning 98 foizi o‘zini xavfsiz deb hisoblagan bo‘lsa, ayollarning ham 97 foizi shu fikrni bildirgan. Bu ko‘rsatkich mamlakatdagi xavfsizlik va jamoat tartibining barqaror ekanini yanada oydinlashtiradi.
Gellap instituti hisobotida ta’kidlanishicha, Singapurdagi bu yuqori natijalar jinoyatchilik darajasining juda pastligi, huquq-tartibot organlarining samarali faoliyati hamda aholi orasidagi jamoat tartibining yuqori madaniyati bilan bog‘liq. Mamlakatda xavfsizlik siyosati nafaqat davlat, balki fuqarolarning ham mas’uliyatli munosabati orqali ta’minlanmoqda.
Shu tariqa, Singapur yana bir bor dunyo miqyosida eng xavfsiz davlat sifatida tan olindi va bu mamlakatning xalqaro nufuzini yanada mustahkamladi.
“Zamin”ni Telegramʻda oʻqing!
