Tunisda 56 yoshli Saber Shushan internetda mamlakat prezidenti Qays Saidni tanqid qilgan postlari tufayli o‘lim jazosiga mahkum qilindi. Bu haqda Daily Mail nashri ma’lum qilmoqda. Ushbu qaror bo‘yicha advokat Ussam Butaljaning bayonotida, Nabeldagi sudya mijozini ijtimoiy tarmoqlardagi postlari uchun qatag‘on etgani va uni o‘lim jazosiga hukm qilgani aytilgan. Advokat bu qarorni “ hayratlanarli va misli ko‘rilmagan” deb ta’riflab, hukm ustidan shikoyat allaqachon kiritilganini ma’lum qildi.
Himoyachi ma’lumotlariga ko‘ra, Saber Shushan siyosiy faol emas va oddiy ma’lumotli ishchi bo‘lib, hibsga olinishidan oldin prezident siyosatidan noroziligini bildirgan. Uning ukasi esa “Biz shundoq ham qashshoqlikda yashayapmiz, endi unga zulm va adolatsizlik qo‘shildi. Bu qarorga ishona olmaymiz” degan fikrni bildirgan.
Tunisda o‘lim jazosi kamdan-kam qo‘llaniladi va 30 yildan ortiq vaqt davomida ijro etilmagan. Shunga qaramasdan, bunday qaror ijtimoiy tarmoqlarda keng norozilik va bahs-munozaralarga sabab bo‘ldi. Ko‘plab tunisliklar va huquq himoyachilari bu qarorni siyosiy tanqidchilarni qo‘rqitishga urinuvchi qadam sifatida baholashdi.
Eslatib o‘tamiz, shu yil may oyida Salvador hukumati prezident Nayib Bukeleni tanqid qilgan mashhur advokat Rut Eleonora Lopesni ham hibsga olgan edi. Bu holatlar dunyo bo‘yicha ijtimoiy tarmoqlarda davlat rahbarlariga tanqid qilish va so‘z erkinligi masalasini yanada dolzarb qilib qo‘ydi.
“Zamin”ni Telegramʻda oʻqing!
