NBC News xabariga ko‘ra, Vashington G‘azodagi o‘t ochishni to‘xtatish shartnomasi ijrosini kuzatish uchun Isroil hududiga 200 nafargacha amerikalik harbiy xizmatchini joylashtirish rejasini ishlayapti. Manbalar aytishicha, ular logistika, transport, muhandislik va rejalashtirish bo‘yicha amaliy yordam ko‘rsatadi. Eng muhim jihat — «G‘azo sektorida birorta ham amerikalik askar bo‘lmaydi», deya aniqlik kiritilgan.
Mazkur tashabbus fuqaro-harbiy muvofiqlashtirish markazi formatida amalga oshiriladi. Kelishuv e’lon qilinganidan keyin mexanizm ishga tushirildi va AQSH qo‘shinlarining bir qismi Isroilga allaqachon yetib kelgani qayd etilmoqda. Guruh gumanitar yordam oqimini qo‘llab-quvvatlaydi, hodisalarning oldini olish (deconfliction) tizimining uzluksiz ishlashini nazorat qiladi.
Rasmiylar eslatishicha, amerikalik harbiylar bundan avval ham Isroilda turli missiyalarda, jumladan, raketaga qarshi mudofaa mashqlarida qatnashgan. Qo‘shma Shtatlar o‘tgan yili Livandagi otashkesim paytida Isroil — «Hizbulloh» o‘rtasidagi deeskalatsiya kanallarini ham qo‘llab-quvvatlagan edi.
Bu orada Isroil hukumati HAMAS bilan kelishuvni ma’qulladi: G‘azodan garovdagilar ozod etilishi evazigi Isroil tomoni umrbod qamoqqa hukm qilingan 250 nafar mahbusni va 2023-yil 7-oktyabrdan beri hibsga olingan 1700 falastinlikni qo‘yib yuborishga tayyor. Hujjat, shuningdek, gumanitar yordam yetkazib berishni kengaytirish, HAMASni qurolsizlantirish va Isroil qo‘shinlarini sektordan bosqichma-bosqich chiqarish kabi bandlarni ham o‘z ichiga oladi.
Kelishuv haqidagi ma’lumotni AQSH prezidenti o‘zining Truth Social sahifasida ham e’lon qilgan. Xulosa qilib aytganda, Vashingtonning Isroildagi maxsus guruhi front orqasidagi «mozaika»ni yig‘ish — ya’ni, gumanitar ishlarni tizimlash, kelishuv shartlariga rioya qilinishini monitoring qilish va ehtimoliy tushunmovchiliklarni oldindan bartaraf etishni maqsad qiladi.
“Zamin”ni Telegramʻda oʻqing!
