HAMAS harakati 13 oktyabr, dushanba kuni ertalab 7 nafar isroillikni asirlikdan ozod etib, ularni Xalqaro Qizil Xoch qo‘mitasiga topshirdi, deb xabar berdi mahalliy manbalar. Ma’lumotlarga ko‘ra, ushbu shaxslar 737 kun davomida asirlikda bo‘lishgan.
Ozod etish jarayoni G‘azo sektori shimolidagi Netsarim koridorida boshlangan. Bir necha soat o‘tib, janubdagi Xon-Yunus shahrida garovga olinganlarni ozod qilishning navbatdagi bosqichi amalga oshirilishi belgilangan.
Ma’lum qilinishicha, ozod etilgan isroilliklar Isroil mudofaa kuchlariga (TsAXAL) topshirilishi kerak. O‘t ochishni to‘xtatish haqidagi kelishuvga ko‘ra, asirlikda halok bo‘lganlarning jasadlari tirik garovda bo‘lganlar ozod etilgandan keyin 72 soat ichida qaytarilishi lozim.
Garovga olinganlarning oilalari avvalroq Isroil janubidagi Reim harbiy aviabazasiga yetib kelgan. Ozod etilganlar tibbiy ko‘rikdan o‘tib, shundan so‘ng yaqinlari bilan ko‘rishishi kutilmoqda. Xalqaro Qizil Xoch qo‘mitasi vakillari ozod etishdan bir necha soat avval asirlar bilan uchrashib, ularning ayrimlari og‘ir ahvolda ekanini ma’lum qilgan, deb yozadi Isroilning “Yediot Ahronot” nashri.
Ayni paytda AQSh prezidenti Donald Tramp garovdagilarni ozod etish marosimiga yetib kelgani ma’lum qilindi. Trampning aytishicha, u keyinchalik Misrga borib, tinchlik kelishuvini imzolashda ishtirok etishni rejalashtirmoqda.
Associated Press agentligi yozishicha, o‘t ochishni to‘xtatish va garovdagilarni ozod etish — taklif qilingan tinchlik rejasining ilk qadami hisoblanadi. Shu bilan birga, keyingi bosqichlarga oid ayrim bahs va kelishmovchiliklar hali ham saqlanib turibdi. Bu holat mojaro haqiqatan ham tugagani yoki yo‘qligi borasidagi noaniqlikni kuchaytirmoqda.
Shunday qilib, ikki yilga yaqin asirlikdan so‘ng, 7 nafar isroillikning ozod etilishi G‘azo mintaqasidagi uzoq yillik nizoga nisbatan ehtimoliy yangi sahifani ochishi mumkin. Ammo tinchlik yo‘lidagi bu harakatlar qanchalik samarali bo‘lishini vaqt ko‘rsatadi.
“Zamin”ni Telegramʻda oʻqing!
