Xitoyda qo‘llanilayotgan texnologiyalar yana bir qadam oldinga siljidi — endi politsiya xizmatida sun’iy intellektli robot-itlar ham xizmat qila boshladi. Global Times nashrining yozishicha, Xanchjou shahridagi ko‘chalarda maxsus patrul vazifasini bajaruvchi intellektual robotlar sinovdan o‘tkazilmoqda.
Ta’kidlanishicha, bu qurilmalar oy oxirigacha to‘liq politsiya tarkibiga qo‘shilishi rejalashtirilgan. Ular yuqori aniqlikdagi kameralar, harakat sensorlari va sun’iy intellekt tizimi bilan jihozlangan. Shuning hisobiga robotlar atrofdagi muhitni mustaqil tahlil qilib, real vaqtda qaror qabul qila oladi.
Robot-itlar asosan yo‘l qoidalarini buzgan holatlarni, ayniqsa taqiqlangan joylarda to‘xtagan avtomobillarni aniqlash, jamoat tartibini kuzatish va xavfsizlikni ta’minlashda foydalaniladi. Politsiya xodimlariga yordamchi sifatida ular kunduzi ham, kechasi ham patrul vazifasini bajarishi mumkin.
Mutahassislar fikricha, bunday loyihalar Xitoyda xavfsizlik tizimini raqamlashtirish va avtomatlashtirish yo‘lidagi muhim bosqich hisoblanadi. Ayrim ekspertlar robot-itlar insonni butunlay almashtira olmaydi, lekin xavfli hududlarda yoki favqulodda holatlarda ular juda samarali bo‘lishi mumkinligini ta’kidlamoqda.
Bu tajriba Xanchjouda muvaffaqiyatli o‘tsa, loyiha boshqa shaharlarda ham joriy etilishi kutilmoqda. Xitoy hukumati bu orqali xavfsizlikni yangi darajaga olib chiqishni maqsad qilgan.
“Zamin”ni Telegramʻda oʻqing!
