Telegram asoschisi Pavel Durov yaqinda Luvr muzeyida sodir bo‘lgan o‘g‘irlikdan so‘ng Fransiya hukumatini qattiq tanqid qildi va o‘g‘irlangan taqinchoqlarni shaxsan o‘zi sotib olib, muzeyga qaytarishga tayyorligini ma’lum qildi.
U o‘zining X ijtimoiy tarmog‘ida yozgan postida Fransiya rahbariyatini “haqiqiy tahdidlar bilan kurashish o‘rniga soxta tahdidlar ortidan quvishda” aybladi.
“Luvrning talon-toroj qilinishi meni hayratga solmadi. Bu bir vaqtlar buyuk bo‘lgan mamlakatning tanazzulining navbatdagi alamli belgisidir”, — deb yozdi Durov.
Oradan ko‘p o‘tmay, u yana bir izoh qoldirib, “o‘g‘irlangan taqinchoqlarni bajonidil sotib olib, ularni Abu-Dabi Luvriga qaytarishga tayyorman. Abu-Dabidagi Luvrdan hech kim o‘g‘irlamaydi”, deya qo‘shimcha qildi.
Eslatib o‘tamiz, Pavel Durov o‘tgan yili Fransiyada hibsga olinib, keyin ozod etilgan edi. U o‘zining so‘nggi bayonotida bu voqea Fransiyaning erkin davlat sifatidagi obro‘siga putur yetkazganini ta’kidladi.
“Zamin”ni Telegramʻda oʻqing!
