Rossiyada ikki ommabop messenjer — Telegram va WhatsApp ishi qisman cheklanishi mumkin. Bu haqda Roskomnadzorning ma’lumotlariga tayanib, “RBK” xabar berdi.
Idoraga ko‘ra, mazkur platformalar firibgarlik, tovlamachilik va terrorchilik faoliyatiga yordam berish vositasiga aylanib bormoqda. Huquqni muhofaza qiluvchi organlar va fuqarolardan kelgan ko‘plab shikoyatlar asosida tekshiruv boshlangan.
“Messenjer egalari jinoyatlarga qarshi kurash choralarini ko‘rish haqidagi talablarni e’tiborsiz qoldirgani uchun ularning faoliyatiga nisbatan qisman cheklovlar joriy etilayotgani haqida qaror qabul qilindi”, — deyiladi idora bayonotida.
Ma’lumotlarga ko‘ra, 21 oktyabr kuni Rossiyaning janubiy hududlarida — Krasnodar, Rostov, Astraxan va Stavropol o‘lkalarida Telegram va WhatsApp ishida uzilishlar kuzatilgan.
Hozirda WhatsApp mamlakatda eng ko‘p foydalaniladigan mobil ilova hisoblanadi — uning auditoriyasi 96 milliondan ortiq. Telegram esa 89 million foydalanuvchi bilan ikkinchi o‘rinda turibdi.
Rossiya Ichki ishlar vazirligi ma’lumoticha, so‘nggi yarim yil ichida aynan shu ikki messenjer orqali 140 mingdan ziyod jinoyat sodir etilgan. Shuningdek, idora ularni “chegara ortidan fuqarolarni yollash vositasi” sifatida ham ta’riflagan.
Ekspertlar fikricha, agar cheklovlar amalga oshirilsa, bu Rossiyadagi raqamli muloqot sohasida katta o‘zgarishlarga sabab bo‘lishi mumkin.
“Zamin”ni Telegramʻda oʻqing!
