Vetnamda oxirgi kunlarda yog‘gan kuchli yomg‘irlar va ko‘chkilar ortidan vaziyat keskinlashdi, deb xabar berdi The Independent.
Rasmiy ma’lumotlarga ko‘ra, kuchli toshqinlar natijasida kamida 37 kishi halok bo‘lgan. Hokimiyat haftaning oxirida yana bir kuchli tayfunning yaqinlashayotganini ma’lum qildi.
Oktyabr oxiridan beri yog‘gan rekord darajadagi yomg‘irlar ko‘plab hududlarni vayron qilgan. Qishloqlar suv ostida qolgan, uylar qulab tushgan, o‘n minglab odamlar boshpanasiz qolgan. Danang shahri va qator viloyatlar elektr hamda aloqa tarmoqlaridan uzilgan.
Vetnam Milliy gidrometeorologik markazi ma’lum qilishicha, 5 noyabrga kelib shamol tezligi soatiga 166 kilometrgacha yetishi mumkin. Yangi bo‘ron Filippin orollaridan o‘tib, Janubiy Xitoy dengiziga kirgach kuchayishi taxmin qilinmoqda.
VN Express yozishicha, UNESCO jahon merosi ro‘yxatidagi qadimiy Xoyan shahri ham suv ostida qolgan. Aholi shahar ko‘chalarida qayiqlarda harakatlanmoqda.
“Bangkok Post” ma’lumotlariga ko‘ra, faqat joriy yilning o‘zida Vetnam 12 ta yirik bo‘ronni boshidan kechirgan, 240 dan ortiq kishi halok bo‘lgan. Iqtisodiyotga yetgan zarar 53,8 trillion dongdan oshgan.
Muttaxassislar mamlakatning uzun qirg‘oq chizig‘i va iqlim o‘zgarishi Vetnamni siklonlar uchun yanada himoyasiz holga keltirayotganini ta’kidlamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
