Eron poytaxti Tehronda ichimlik suvi bilan bog‘liq vaziyat juda yomonlashdi, deb xabar berdi Al Jazeera. Mamlakatdagi tarixiy qurg‘oqchilik tufayli shaharni suv bilan ta’minlovchi asosiy manbalar qurib bormoqda.
Ma’lumotlarga ko‘ra, Amir Kabir to‘g‘onida hozir atigi 14 million kub metr suv qolgan. Bu to‘g‘onning umumiy sig‘imining bor-yo‘g‘i 8 foizi bo‘lib, mutaxassislar bu zaxira faqat ikki haftaga yetishi mumkinligini aytmoqda.
So‘nggi oylarda Tehronda deyarli yomg‘ir yoqmagan. Bir yil avval ushbu to‘g‘onda 86 million kub metr suv saqlangan bo‘lsa, hozir bu ko‘rsatkich deyarli yo‘qolgan.
10 milliondan ortiq aholiga ega poytaxt har kuni taxminan 3 million kub metr suv iste’mol qiladi. Shaharning ayrim tumanlarida suv ta’minoti vaqtincha to‘xtatilgan, aholi orasida esa norozilik kuchaymoqda.
Mutaxassislar tanqislikning asosiy sabablarini qurg‘oqchilik, yer osti suvlaridan ortiqcha foydalanish va iqlim o‘zgarishi bilan izohlamoqda. Ushbu holat faqat Eronda emas — qo‘shni Iroqda ham suv sathi keskin pasayib, gumanitar inqiroz xavfi kuchaymoqda.
“Zamin”ni Telegramʻda oʻqing!
