Qirg‘iziston poytaxti Bishkekda, Ukraina elchixonasi va Qirg‘iziston prezidentining yangi qarorgohi — “Intimaq Ordo” oralig‘iga zabardast LED-displey qad rostladi. Bu holat Rossiya prezidenti Vladimir Putinning shaharga tashrifi va Kollektiv Xavfsizlik Shartnomasi Tashkiloti (KXShT) sammiti oldidan sodir bo‘ldi. Jurnalist Grigoriy Pirlikning so‘zlariga ko‘ra, bir necha qavatli uy balandligidagi bu inshoot Ukraina elchixonasi hududidagi milliy bayroqni qarorgoh tomonidan ko‘rinishdan yashiradi.
FSO talabi yoki tasodif?
Qirg‘iziston prezidenti matbuot xizmati ekranning rasmiy maqsadini “davlat video kontentlarini ko‘rsatish va protokol tadbirlariga vizual hamrohlik qilish” deb tushuntirdi. Biroq, bir qator OAV buni to‘g‘ridan-to‘g‘ri Putinning tashrifi bilan bog‘ladi. Qirg‘izistondagi Ukraina elchisi maslahatchisi Denis Avtonomov qisqacha: “Bog‘liqlik shubhasiz mavjud”, deya izoh berdi. Siyosiy sharhchi Turat Akimov buni Rossiya FSO (Prezidentni qo‘riqlash xizmati) faoliyatiga bog‘lab, maxsus xizmat xodimlari Ukraina elchixonasi hududidan Putin uchun xavf paydo bo‘lishi ehtimolini hisobga olgan bo‘lishi mumkinligini taxmin qildi.
Putinning yangi tahdidlari va sulh rejasi
Putin “Intimaq Ordo”da o‘tgan KXShT sammiti yakunlari bo‘yicha matbuot anjumanida nutq so‘zladi. Rossiya yetakchisi dekabr oyining boshida AQSH delegatsiyasi Moskvaga Donald Trampning sulh rejasini muhokama etish uchun kelishini tasdiqladi. U Moskva AQSH ma’qullagan urushni to‘xtatish rejasini kelgusi kelishuvlar asosi sifatida qabul qilishga tayyorligini aytdi. Shu bilan birga, Putin tahdidli ohangda bildirdi: Rossiya Ukraina sharqida o‘zi talab qilayotgan hududlar berilmaguncha harbiy harakatlarni davom ettiradi va agar Ukraina qo‘shinlari chiqib ketmasa, bunga “qurolli yo‘l bilan erishishga” va’da berdi.
Kiyevning qat’iy rad etishi
Ukraina prezidenti devoni rahbari Andrey Yermak 27 noyabr kuni The Atlantic nashriga bergan intervyusida Kiyev hududlardan voz kechish masalasini muhokama qilmasligini ma’lum qildi. U Konstitutsiya bunga yo‘l qo‘ymasligini ta’kidlab, Volodimir Zelenskiy prezident bo‘lib turgan ekan, okkupatsiya qilingan hududlarni tan olishga “hech kim umid qilishi kerak emas”ligini aytdi. Yermakning so‘zlariga ko‘ra, hozir Ukraina gaplasha oladigan yagona narsa — urush qilayotgan tomonlar nazoratidagi hududlarni ajratib turadigan chegara chizig‘ini muhokama qilishga tayyorligidir.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
