Turkiyaning yirik qurilish kompaniyalaridan biri Istanbul xalqaro aeroportidagi qurilish maydonlarida ishlash uchun O'zbekiston fuqarolaridan iborat guruhni ishga qabul qiladi. Ish beruvchi xodimlarni transport bilan ta'minlaydi, yashash joyi va kuniga uch mahal ovqatni yo'lga qo'yadi, shuningdek maxsus kiyim hamda shaxsiy himoya vositalarini beradi. Bundan tashqari, Turkiyada rasmiy ishlash ruxsatnomasini rasmiylashtirib beradi. Bu haqda podrobno.uz xabar beradi.
“Dunyo” ma'lumotiga ko'ra, tashabbus O'zbekistonning Istanbuldagi Bosh konsulxonasi hamda ADS Hukuk konsalting kompaniyasi o'rtasidagi muzokaralar natijasida yuzaga kelgan. Kelishuv Turkiyaning yetakchi kompaniyalaridan biri — Kalyon Insaat Sanayi Ve Ticaret A.Sh. bilan erishilgan. Kompaniya ko'p yillardan beri qurilish, energetika va transport yo'nalishlarida yirik loyihalarni amalga oshirib keladi.
Kelgusida dastur ko'lamini kengaytirish va qurilish jarayoniga qo'shimcha xodimlarni saralab olish rejalashtirilgan.
Shu bilan birga, O'zbekistonda chet elda ishlash uchun kadrlar tayyorlash bo'yicha loyihalar ham yo'lga qo'yilmoqda. Jumladan, Toshkentda Abu Ali ibn Sino nomidagi texnikum bazasida Germaniya tibbiyot akademiyasi ochildi. Joriy o'quv yilida bu yerda Germaniya klinikalarida ishlash imkoniga ega bo'ladigan 750 nafar hamshira va o'rta bo'g'in tibbiyot xodimlari tayyorlanadi.
“Zamin”ni Telegramʻda oʻqing!
