Belgiyada Tokio universiteti olimlari tomonidan Nipax virusiga qarshi yaratilgan vaksinaning ilk klinik sinovlari boshlanishi kutilmoqda. Xabarga ko‘ra, bu bosqichda sinovlar odamlar ishtirokida o‘tkaziladi, deya ma’lum qildi Nikkei.
Ma’lum qilinishicha, vaksinaning primatlarda o‘tkazilgan tajribalarida 100 foizlik natija qayd etilgan. Endi esa eng muhim qadam — inson organizmida xavfsizlik va samaradorlikni tekshirish.
Olimlar kelgusida tadqiqot geografiyasini kengaytirishni ham rejalashtirmoqda: keyingi bosqichda Bangladeshda kattalar va bolalar ishtirokida qo‘shimcha sinovlar o‘tkazilishi mumkin.
Eslatib o‘tish joiz, avvalroq Hindistonning Kalkutta shahri yaqinida Nipax virusi tarqalayotgani haqida xabarlar paydo bo‘lgandi. Ushbu virus hayvonlardan yuqishi, zararlangan oziq-ovqat orqali tarqalishi yoki insondan insonga yuqishi ham mumkinligi ta’kidlanadi.
Jahon sog‘liqni saqlash tashkiloti ma’lumotlariga ko‘ra, Nipax virusi yuqtirilganda o‘lim darajasi 40 foizdan 75 foizgacha yetishi mumkin — bu esa epidnazorat sifati va mahalliy tibbiyot tizimi imkoniyatlariga bog‘liq.
Qisqasi, vaziyat hali “hammasi hal bo‘ldi” degani emas, lekin klinik sinovlar boshlanishi — juda katta qadam. Agar natijalar ijobiy chiqsa, Nipaxga qarshi kurashda kuchli “qalqon” paydo bo‘lishi mumkin.
“Zamin”ni Telegramʻda oʻqing!
