Italiyaning Torre Lapillo shahrida 57 yoshli erkak umr bo‘yi yig‘ib kelgan boyligini bir lahzada yo‘qotib qo‘yayozdi. Gap shundaki, u 20 ta oltin quymani bilmasdan chiqindi bilan birga tashlab yuborgan.
Ma’lum bo‘lishicha, qiymati 120 ming yevro atrofida baholangan quymalar tunuka qutida saqlangan. Erkak xonadondagi chiqindilarni tashlar ekan, aynan shu qutini ham bakka uloqtirib yuborgan. Eng og‘iri — buni ertasi kunigina anglab yetgan.
Shundan so‘ng u darhol politsiyaga murojaat qilgan. Dastlab xodimlar bu gapga unchalik ishonmagan, ammo kuzatuv kameralari yozuvlari tekshirilgach, voqea rost ekani tasdiqlangan.
Tekshiruv davomida chiqindilar allaqachon qo‘shni Ugento shahridagi chiqindixonaga olib ketilgani aniqlangan. Huquqni muhofaza qiluvchi organlar u yerda qidiruv tashkil qilib, nihoyat oltin quymalar solingan qutini topishga muvaffaq bo‘lgan.
Qizig‘i, bunga o‘xshash holat yaqinda Tailandda ham kuzatilgan: 2025 yil noyabrda bir ayol taxminan 62 ming dollarlik uchta oltin quymani chiqindiga tashlab yuborgani aytilgan. Uning o‘g‘li quymalarni qaytarganlarga mukofot va’da qilgan, ayol esa demensiyadan aziyat chekayotgani qayd etilgan.
“Zamin”ni Telegramʻda oʻqing!
