Boliviyada mamlakat harbiy-havo kuchlariga tegishli, Markaziy bank uchun yangi banknotlar olib ketayotgan yuk samolyoti halokatga uchrab, og‘ir fojiaga sabab bo‘ldi. Xalqaro axborot manbalariga ko‘ra, kamida 15 kishi halok bo‘lgan, qurbonlar soni yanada aniqlashtirilmoqda. Samolyot El-Alto xalqaro aeroporti yaqinida qo‘nish chog‘ida uchish-qo‘nish yo‘lagidan chiqib ketib, shosse yo‘liga tushgan va bir nechta transport vositasiga zarar yetkazgan.
Hodisa La-Pas yaqinidagi El-Alto hududida sodir bo‘lgan. Gap Lockheed C-130 Hercules rusumidagi harbiy yuk samolyoti haqida ketmoqda. U Boliviya Markaziy banki ehtiyojlari uchun mo‘ljallangan yangi chop etilgan kupyuralarni tashib kelayotgan bo‘lgan. Qo‘nishdan keyin samolyot nazoratdan chiqib, yaqin atrofdagi yo‘lga chiqib ketgan, oqibatda avtomashinalarga urilib, halokat manzarasini yanada og‘irlashtirgan.
Eng shov-shuvli jihatlardan biri — samolyotdan tushib ketgan kupyuralar atrofga sochilib ketganidir. Shu bois voqea joyida yuzlab odamlar to‘planib, pullarni yig‘ib olishga uringan. Bu esa qutqaruv ishlarini jiddiy qiyinlashtirgan. Xabarlarga ko‘ra, politsiya va harbiylar hududni nazoratga olish uchun katta kuch jalb qilgan, ayrim holatlarda to‘planganlarni tarqatish uchun ko‘zdan yosh chiqaruvchi gaz va suv ham ishlatilgan.
Boliviya Markaziy banki vakillari esa samolyotdan sochilib ketgan banknotlar hali rasman muomalaga kiritilmagani uchun huquqiy jihatdan haqiqiy emasligini ta’kidlagan. Shuning uchun mahalliy aholiga ularni qaytarish chaqirig‘i yo‘llangan. Rasmiylar bu kupyuralarni olib qolish yoki yashirish jinoiy baholanishi mumkinligini ham eslatgan. Ayrim xabarlarda hatto ushbu pullar voqea joyida yo‘q qilingani aytilmoqda.
Hozircha halokatning aniq sababi ochiqlanmagan. Tergov davom etmoqda, aeroportdagi barcha reyslar esa vaqtincha to‘xtatilgan. Qisqasi, bu hodisa Boliviya uchun nafaqat transport fojiasi, balki xavfsizlik, moliyaviy logistika va jamoat tartibi masalalarini ham bir vaqtning o‘zida kun tartibiga olib chiqqan og‘ir voqeaga aylandi.
“Zamin”ni Telegramʻda oʻqing!
