Mashhur xonanda Alla Pugacheva Kiprdagi o'ziga tegishli bo'lgan hashamatli qasrni sotib, boshqa xavfsizroq hududga ko'chib o'tishni rejalashtirmoqda. Bu qarorga Yaqin Sharqdagi notinch vaziyat va xonandaning uyi joylashgan hududning Britaniya harbiy bazalariga yaqinligi sabab bo'lgan. Ma'lumki, mazkur bazalar Eron dronlari hujumiga uchrash xavfi ostida qolmoqda. Bu haqda rieltor Mark Gershkovich o'z kuzatuvlari bilan o'rtoqlashdi.
Mutaxassisning so'zlariga ko'ra, Limasol shahrining eng nufuzli qismida joylashgan bu ko'chmas mulkni 4 million yevrodan 6 million yevrogacha bo'lgan narxda sotish imkoniyati mavjud. Qizig'i shundaki, mintaqadagi siyosiy keskinlik Kiprdagi uy-joy narxlariga salbiy ta'sir ko'rsatmagan. Aksincha, qo'shni davlatlardan kelayotgan badavlat insonlar oqimi tufayli ko'chmas mulk qiymati yanada oshishi mumkin.
Eslatib o'tamiz, Alla Pugacheva va uning turmush o'rtog'i Maksim Galkin 2019 yilda Kiprda uch qavatli, umumiy maydoni 600 kvadrat metrga teng bo'lgan qasr qurilishini boshlagan edi. O'sha vaqtda loyihaning qiymati 2,5 million yevrodan oshgan. Dengiz bo'yida joylashgan ushbu uy o'zining panoramali derazalari va shinam terassalari bilan ajralib turadi. Hozirgi kunda xonanda oilasi bilan birga xavfsizroq manzil izlashga majbur bo'lmoqda.
“Zamin”ni Telegramʻda oʻqing!
