AQSH prezidenti Donald Tramp saylov qonunchiligini tubdan o'zgartirish bo'yicha qat'iy talab bilan chiqdi. U Senat "Amerika saylovchilarining saylovda qatnashish huquqini himoya qilish to'g'risida"gi qonunni qabul qilmaguniga qadar hech qanday qonun loyihasini imzolamasligini ma'lum qildi. Bu haqda davlat rahbari o'zining Truth Social ijtimoiy tarmog'idagi sahifasida yozib qoldirdi. Bu haqda dw.com xabar beradi.
Trampning ta'kidlashicha, yangi qonun loyihasi saylov jarayonida "oltin standart"ni o'rnatishi kerak. Unga ko'ra, har bir saylovchi o'z shaxsini tasdiqlovchi hujjat va fuqaroligini ko'rsatuvchi ma'lumotnomani taqdim etishi shart. Shuningdek, prezident pochta orqali ovoz berish tizimini bekor qilishni talab qilmoqda. Istisno tariqasida faqat harbiy xizmatchilar, bemorlar va nogironligi bo'lgan shaxslarga pochta orqali ovoz berishga ruxsat berilishi mumkin.
Ushbu tashabbus respublikachilar tomonidan keng qo'llab-quvvatlanmoqda. Hozirda AQSH Kongressining har ikkala palatasi respublikachilar nazoratida bo'lsa-da, demokratlar mazkur qonun loyihasiga qarshi chiqmoqda. Ularning fikricha, bunday cheklovlar oddiy fuqarolarning saylovda ishtirok etishiga to'sqinlik qiladi va ovoz berish jarayonini murakkablashtiradi.
Tramp Senatdagi respublikachilar yetakchisi Jon Tyunga murojaat qilib, qonunni qabul qilish uchun maxsus taktikadan foydalanishni so'radi. Uning maqsadi 2026 yil kuzida bo'lib o'tadigan oraliq saylovlar oldidan saylov qoidalarini o'zgartirish va o'z pozitsiyasini mustahkamlashdan iborat. Siyosiy tahlilchilarning qayd etishicha, AQSHda hukmron partiya ko'pincha oraliq saylovlarda qiyinchiliklarga duch keladi, shu sababli Tramp hozirdanoq xavfsizlik choralarini kuchaytirishga harakat qilmoqda.
“Zamin”ni Telegramʻda oʻqing!
