Tojikistonda muqaddas Ramazon oyi avval xabar qilinganidek 30 kun emas, balki 29 kun davom etishi mumkin. Bu haqda Respublika Din ishlari bo‘yicha qo‘mitasi ma’lumot bergan. Shu sababli Ramazon hayiti 20-martda emas, 19-mart kuni nishonlanishi ehtimoli aytilmoqda.
Idora vakillarining tushuntirishicha, joriy yilda Ramazon oyining davomiyligi qamariy taqvim hisob-kitoblari asosida baholanmoqda. Ularga ko‘ra, bu yil Tojikistonda ro‘za oyi 29 kunda yakunlanishi mumkin.
Mazkur ma’lumotni Tojikiston Ulamolar kengashi raisi Saidmukarram Abdulqodirzoda ham tasdiqlagan. Uning aytishicha, qamariy taqvimda avvalgi ikki oy — Rajab va Sha’bon ketma-ket 30 kundan davom etgani uchun, uchinchi oy odatda 29 kun bo‘lishi kuzatiladi.
Shuningdek, u ko‘plab mamlakatlarda Ramazon Tojikistonga nisbatan bir kun oldin boshlanganini eslatgan. Abdulqodirzodaning fikricha, shu sababli islom dunyosining aksariyat davlatlarida bu yil Id al-Fitr 19-mart kuni nishonlanishi mumkin.
Tojikiston muftiysi aholini turli mish-mishlarga ishonmaslikka va behuda xavotirga tushmaslikka chaqirgan. Uning ta’kidlashicha, rasmiy qarorlar taqvimiy hisob-kitoblar hamda shariat qoidalari asosida qabul qilinadi.
“Zamin”ni Telegramʻda oʻqing!
