Tojikistonda turizm solig‘i joriy etildi: pul qayerga sarflanadi?

Tojikistonda turizm sohasini qo‘llab-quvvatlash va uni rivojlantirish maqsadida maxsus fond tashkil etildi. Yangi tuzilmaning asosiy moliyalashtirish manbalaridan biri esa mahalliy va xorijiy sayyohlardan undiriladigan yig‘imlar bo‘ladi.

Fond qachon tashkil etildi?

Tojikiston hukumati 2026 yil 1 iyul kuni Turizmni rivojlantirish fondini tashkil etish va uning faoliyatini tartibga solish bo‘yicha qaror qabul qildi.

Fond mablag‘larini boshqarish uchun Moliya vazirligining Markaziy g‘aznachilik bosh boshqarmasida maxsus hisob raqami ochiladi. Unda jamlangan mablag‘lar fond kengashining qarorlari asosida sarflanadi.

Turistik paketdan 5 foiz undiriladi

Yangi tizimning eng ko‘p muhokama qilinayotgan jihati — fondni moliyalashtirish uchun turli turistik yig‘imlarning joriy etilishi.

Xususan, Tojikiston fuqarolari xorijga sayohat qilish uchun turistik paket sotib olganida, uning qiymatidan 5 foiz miqdorida yig‘im undirilishi ko‘zda tutilgan.

Bu mablag‘lar Tojikistonda turizm infratuzilmasini rivojlantirishga yo‘naltirilishi rejalashtirilmoqda.

Xorijiy sayyohlar ham to‘laydi

Fond daromadlari faqat Tojikiston fuqarolaridan olinadigan yig‘imlar bilan cheklanmaydi.

Moliyalashtirish manbalari qatoriga:

• xorijiy turistlarning mamlakatdagi har bir sutkalik sayohati uchun undiriladigan yig‘im;

• turistik xizmat ko‘rsatishga ruxsat beruvchi hujjat uchun yig‘im;

• yig‘imlarni to‘lashdan bo‘yin tovlaganlik uchun jarimalar;

• depozitlardan olinadigan daromadlar;

• xalqaro moliya tashkilotlarining grantlari;

• maqsadli mablag‘lar kiradi.

Turizm uchun yangi moliyaviy mexanizm

Shunday qilib, Tojikiston turizm sohasini alohida fond orqali moliyalashtirish mexanizmini yaratmoqda. Biroq fuqarolarning xorijga chiqishi uchun turistik paket qiymatining 5 foizi miqdorida yig‘im belgilanishi yangi tizimning eng bahsli jihatlaridan biri bo‘lib qolmoqda.

Fondda to‘planadigan mablag‘larning aniq qaysi loyihalarga yo‘naltirilishi esa fond kengashi qarorlari asosida belgilanadi.