Eron Amerika Qo'shma Shtatlari bilan muzokaralarni qayta tiklash uchun uchta asosiy shartni ilgari surdi. Livan telekanallaridan birining xabar berishicha, Tehron urushning qayta boshlanmasligi bo'yicha kafolat, to'liq yadroviy yoqilg'i sikliga ega bo'lish hamda yetkazilgan zararlar uchun tovon puli to'lanishini talab qilmoqda. Bu haqda tengrinews.kz xabar beradi.
Eslatib o'tamiz, joriy yilning 28 fevral kuni AQSh va Isroil Eronga qarshi harbiy operatsiya boshlagan edi. Tel-Aviv ushbu harakatlarning asosiy maqsadi Tehronning yadroviy qurolga ega bo'lishiga yo'l qo'ymaslik ekanini ma'lum qilgan. O'z navbatida, Vashington Eron flotini va mudofaa sanoatini yo'q qilish bilan tahdid qilib, mamlakat fuqarolarini amaldagi rejimni ag'darishga chaqirgan edi.
So'nggi ma'lumotlarga ko'ra, AQSh va Isroilning Eronga bergan zarbalari oqibatida kamida 1300 kishi halok bo'lgan. Qurbonlar orasida Eronning oliy rahbari Ali Xomenei ham bor. 9 mart kuni Ekspertlar kengashi halok bo'lgan rahbarning o'g'li Mojtaba Xomeneini Eronning yangi oliy rahbari etib tayinladi.
Ommaviy axborot vositalarining xabarlariga ko'ra, raketalar nafaqat harbiy ob'ektlarga, balki Eron va mintaqadagi boshqa davlatlarning fuqarolik infratuzilmalariga ham kelib tushmoqda. Bunga javoban Tehron Isroil hududiga hamda Yaqin Sharqdagi Amerika harbiy bazalariga hujumlar uyushtirmoqda.
“Zamin”ni Telegramʻda oʻqing!
