Afg‘oniston rasmiylari Pokiston kuchlari 16 mart kuni Kobul shahrida havo hujumlarini amalga oshirganini da’vo qilishdi. Tolibon hukumatining vakili Zabihulla Mujohid bu hujumni “jinoyat va g‘ayriinsoniy harakat” deb atadi, deb xabar beradi AFP agentligi.
Associated Press ma’lumotlariga ko‘ra, zarba giyohvandlarni davolash markaziga qaratilgan bo‘lib, kamida 400 kishi halok bo‘lgan va taxminan 250 kishi jarohat olgan. CNN xabariga ko‘ra, hujum mahalliy vaqt bilan soat 21:00 atrofida sodir bo‘lgan va 2000 o‘ringa mo‘ljallangan binoning katta qismi vayron bo‘lgan.
Pokiston ushbu ayblovlarni rad etdi va hujumlarni “yolg‘on va chalg‘ituvchi” deb atadi. Axborot vazirligi bayonotida, zarbalar faqat harbiy inshootlar va terrorchilarni qo‘llab-quvvatlash infratuzilmasini, jumladan Afg‘onistondan faoliyat yuritayotgan Pokiston jangarilari bazalarini nishonga olganini ma’lum qildi.
Ikki mamlakat o‘rtasidagi mojaro 22 fevral kuni Pokistonning “Tehrik-e-Tolibon” pozisiyalariga hujum qilganidan so‘ng avj oldi. Hodisa xalqaro hamjamiyat e’tiborini qozonmoqda va hududiy xavfsizlik masalalarini yanada dolzarb qilmoqda.
“Zamin”ni Telegramʻda oʻqing!
