AQSH rasman Rossiya, Xitoy, Eron, Shimoliy Koreya va Pokistonni yadroviy qurol bilan hujum qilishga qodir davlatlar ro‘yxatiga kiritdi. Bu ma’lumot AQSH hukumati razvedka hamjamiyati tomonidan tayyorlangan yillik hisobotda keltirilgan.
Hisobotda ta’kidlanishicha, mazkur davlatlar nafaqat yadroviy qudratga ega, balki an’anaviy jangovar qudratni ham rivojlantirishda davom etmoqda. Ular ilg‘or, yangi va an’anaviy raketalarni tadqiq qilib, ishlab chiqmoqda. Razvedka hamjamiyati prognoz qiladiki, 2035-yilga kelib AQSHga nisbatan tahdid soluvchi raketalar soni 16 000dan ortiqga yetadi, hozirgi 3 000dan yuqori bo‘lgan darajadan sezilarli ravishda oshishi kutilmoqda.
Shimoliy Koreya butun AQSH hududiga yetadigan qit’alararo ballistik raketalarni sinovdan muvaffaqiyatli o‘tkazdi. Hujjatda shuningdek, Xitoy, Eron, Shimoliy Koreya, Pokiston va Rossiya davlatlari ilg‘or raketalarga ustuvor ahamiyat berishda davom etayotgani qayd etilgan.
Razvedka hamjamiyati Rossiyani “Arktikadagi asosiy muammo” deb atadi. Hisobotga ko‘ra, Moskva mintaqadagi manfaatlarni ilgari surish uchun global raqobatni faol tarzda qo‘llab-quvvatlamoqda. Ular dengiz savdosini rivojlantirish, tabiiy resurslarni qazib olish va harbiy faoliyat orqali Arktikadagi mavjudligini kengaytirishni maqsad qilgan.
Xitoy esa Arktikada strategik va iqtisodiy manfaatlarini rivojlantirishda Rossiya bilan munosabatlarni asosiy vosita sifatida qo‘llamoqda. Bu esa mintaqadagi global raqobatni yanada murakkablashtirmoqda.
Shu bilan birga, AQSH prezidenti Donald Tramp mamlakat milliy xavfsizligini ta’minlash uchun Grenlandiyaga ehtiyoj borligini ta’kidladi. Uning fikricha, bu hudud nazoratdan chiqib ketsa, uni Rossiya yoki Xitoy nazorat qiladi, bu esa strategik jihatdan jiddiy tahdid hisoblanadi.
Hisobot va Trampning bayonoti Amerika va global xavfsizlikni muhokama qilayotgan ekspertlar uchun muhim signal hisoblanadi. Ushbu holat nafaqat AQSH siyosatini, balki butun dunyodagi harbiy va geosiyosiy manzarani ham shakllantirishga ta’sir qiladi.
“Zamin”ni Telegramʻda oʻqing!
