Foto: Reuters
Pentagon Erondagi ehtimoliy quruqlik amaliyotlari uchun bir necha haftadan ikki oygacha davom etadigan tayyorgarlik ishlarini boshladi, deb xabar bermoqda The Washington Post, manbalarga tayanib.
Nashr maʼlumotlariga ko‘ra, Pentagon hozirda ko‘rib chiqayotgan ssenariylardan hech biri keng ko‘lamli bosqinni nazarda tutmaydi. Tayyorgarlik ishlari asosan Ho‘rmuz bo‘g‘ozi sohilida savdo va harbiy kemalarni yo‘q qiladigan qurollar obyektlariga nisbatan mahdud reydlarni, shuningdek Eron neftining asosiy eksport markazi bo‘lgan Xarq orolini bosib olishni o‘z ichiga oladi. Bunda maxsus kuchlar va oddiy piyodalar faoliyat ko‘rsatadi.
Nashr qayd etadi, har qanday quruqlik missiyasi AQSH harbiylarini xavf ostiga qo‘yishi mumkin: ular raketa va dron hujumlari, qurolli qo‘lbola portlovchi qurilmalar va zamindan otilgan o‘qotishlar orqali sodir etilishi mumkin bo‘lgan xavflarga duch keladi.
Hozircha Donald Tramp quruqlik kampaniyasini maʼqullagani yoki yo‘qligi rasman maʼlum emas. Oq uy matbuot kotibi Kerolayn Livitt The Washington Post muxbiriga suhbatda Pentagonning vazifasi har qanday ssenariy uchun tayyorgarlik ko‘rish va «bosh qo‘mondonga harakatlarda maksimal erkinlik taqdim etish» ekanligini taʼkidladi. U prezidentning bu operatsiya bo‘yicha qaror qabul qilganini tasdiqlamagan.
Manbalardan biri, maqsadlarga erishish uchun «oylar emas, balki bir necha hafta yetarli bo‘lishi» mumkinligini aytdi. Boshqa manba esa amaliyot «bir necha oyga cho‘zilishi» mumkinligini taʼkidladi.
Senator Lindsi Grem o‘z bayonotida: «Biz Ivodzimada g‘olib chiqqanmiz, buni ham uddalay olamiz. Men har doim dengiz piyodalarining qobiliyatiga ishonaman», – deb bildirdi.
Shu vaqtda ijtimoiy tarmoqlarda AQSH Dengiz piyodalari korpusi zahira kuchlari qo‘mondoni general-leytenant Leonard F. Andersonning xati tarqaldi. Haqiqiyligi tasdiqlanmagan bu murojaatda qo‘mondon zahiradagilarni jangovar tayyorgarlik holatini tekshirishga chaqirib, buni «hozirgi kunda mamlakat qurolli kuchlari Eron bilan bog‘liq amaliyotlarda qatnashishi va umumiy safarbarlik reallikka aylanishi mumkinligi» bilan izohladi.
Amerika nashrlarida bir necha kundan beri Eronda quruqlik amaliyotiga tayyorgarlik ko‘rilayotgani muhokama qilinmoqda. Rasman hech qanday maʼlumot berilmagan. 20 mart kuni AQSH prezidenti Donald Tramp «hech qayerga qo‘shin yubormasligini» bildirgan edi.
Hozirda Yaqin Sharqqa yetib kelgan AQSH harbiy kemalari 4 mingdan ortiq dengiz piyodalarini sig‘dira oladi. Shuningdek, 82-havo desant diviziyasi askarlari jangovar tayyorgarlikda turibdi.
Ehtimoliy quruqlik operatsiyasi amerika aholisi tomonidan qo‘llab-quvvatlanmasligi mumkin. Associated Press tomonidan yaqinda o‘tkazilgan so‘rovda ishtirokchilarning 62 foizi Eronda qurolli kuchlarni qo‘llashga qarshi, faqat 12 foizi bunday rejani maʼqullagan.
“Zamin”ni Telegramʻda oʻqing!
