Islandiya yashash xarajatlari bo‘yicha dunyodagi eng qimmat mamlakat deb topildi. Yangi ma’lumotlarga ko‘ra, ushbu mamlakatdagi umumiy narxlar Yevropa o‘rtacha ko‘rsatkichidan 84 foizga yuqori. Shu tariqa, Islandiya bu borada uzoq yillar qimmat davlatlar qatorida tilga olingan Shveysariyani ham ortda qoldirdi.
Ayniqsa, oziq-ovqat mahsulotlari narxi aholi va sayyohlar uchun sezilarli darajada yuqori. Go‘sht mahsulotlari Yevropa o‘rtacha narxlaridan 71 foiz qimmatroq ekani qayd etilmoqda. Shuningdek, avtomobillar ham taxminan 40 foizga yuqori narxda sotiladi.
Mutaxassislar bunday qimmatchilikni faqat yuqori maoshlar bilan izohlab bo‘lmasligini ta’kidlamoqda. Mamlakatdagi soliq yuki, importga bog‘liqlik, logistika xarajatlari va bozorda raqobatning nisbatan zaifligi ham narxlar oshishiga ta’sir qilmoqda.
Shu bilan birga, Islandiyada narxlar ko‘plab Yevropa davlatlariga qaraganda tezroq o‘sib bormoqda. Bu esa mamlakatda yashashni yanada qimmatlashtiryapti. Qisqasi, Islandiya tabiati, manzaralari va hayot sifati bilan juda jozibali, ammo u yerda yashash ham, sayohat qilish ham ancha qimmatga tushadi.
“Zamin”ni Telegramʻda oʻqing!
