Liftdagi agressiv it ijtimoiy tarmoqlarda bahs-munozaraga sabab bo‘ldi

Hindistonning Mumbai shahrida ko‘p qavatli uylardan birida sodir bo‘lgan hodisa ijtimoiy tarmoqlarda keng muhokamalarga sabab bo‘ldi. Tarqalgan videoda itini liftga olib kirgan fuqaro kutilmagan vaziyatga duch kelgani aks etgan.

Videoda ko‘rinishicha, lift ichiga kirgan zahoti it atrofdagi odamlarga tashlanishga uringan. Egasi jonivorni tinchlantirish va nazorat ostiga olishga harakat qilgan bo‘lsa-da, uning tajovuzkor harakatlari bir muddat davom etgan. Liftdagi yo‘lovchilar esa qo‘rquv bilan liftdan chiqishga harakat qilgan.

Mazkur lavhalar internetda tarqalishi ortidan ko‘plab foydalanuvchilar it egasining mas’uliyati yuzasidan keskin fikrlar bildirmoqda. Ayrimlar bunday holatlarda egalarga nisbatan qat’iy choralar ko‘rish zarurligini ta’kidlasa, boshqalar jamoat joylari, xususan liftlarda yirik itlarni maxsus xavfsizlik vositalarisiz olib yurishni cheklash kerakligini ilgari surmoqda.

Hodisa yuzasidan rasmiy idoralarning munosabati yoki it egasiga nisbatan qandaydir choralar ko‘rilgani haqida hozircha ma’lumot berilmagan.