Gayanada parom ag‘darildi: 27 kishi halok bo‘ldi, 83 kishi esa bedarak yo‘qoldi

Gayana sohillari yaqinida MV Barima yo‘lovchi paromi ag‘darilishi oqibatida kamida 27 kishi halok bo‘ldi, 83 nafarning taqdiri esa haligacha noma’lum. Mamlakat bosh vaziri Mark Fillipsning ma’lum qilishicha, hozirga qadar 69 nafar yo‘lovchi qutqarilgan.

Hodisa yuzasidan qidiruv-qutqaruv ishlari davom etmoqda. Hukumat fojia sabablarini aniqlash uchun rasmiy tergov boshlaganini ma’lum qildi. Bosh vazir aybdorlar aniqlansa, ular qonun oldida javob berishini ta’kidladi.

Jamoat ishlari vaziri Xuan Edgillning aytishicha, rasmiy ro‘yxatda paromda 133 kishi borligi qayd etilgan bo‘lsa-da, aslida kemada 179 nafar yo‘lovchi bo‘lgan. Shuningdek, kapitan va ekipaj a’zolaridan biri marixuana iste’mol qilgani aniqlangan va ular politsiya tomonidan qo‘lga olingan.

Dastlabki ma’lumotlarga ko‘ra, parom katta to‘lqin zarbasidan keyin og‘ib ketib, qisqa vaqt ichida suvga to‘lgan. Omon qolganlardan biri Yelena Munsammi suvda qalqib yurgan qutiga yopishib tirik qolganini, ammo ikki yoshli farzandi bilan ajralib qolganini aytdi.

Qutqarilganlar orasida kamida 15 nafar bola bor. Qidiruv ishlariga Fransuz Gvianasidan yuborilgan g‘avvoslar va shifokorlar ham jalb etilgan. Sog‘liqni saqlash vazirligiga ko‘ra, tirik qolganlarning aksariyati yengil jarohatlar bilan shifoxonadan javob berilgan.