Nyu-Yorkdagi sud binosi oldida yong‘in chiqarmoqchi bo‘lgan shaxs ushlandi (video)

Joriy yilning 20 iyul kuni AQSHning Nyu-York shahridagi Manxetten tumanida joylashgan immigratsiya sudi binosi oldida yong‘in chiqarishga urinish holati yuz berdi. Hodisa bino tashqarisiga o‘rnatilgan videokuzatuv kameralari tomonidan qayd etilgan.

Tarqalgan tasvirlarda noma’lum erkakning sud binosi oldida ataylab olov yoqqani aks etadi. Voqea haqida xabar kelishi bilan hududga tezkor xizmatlar yetib kelgan va yong‘in qisqa fursatda bartaraf etilgan.

Huquq-tartibot xodimlari gumonlanuvchini voqea joyining o‘zida qo‘lga olgan. Dastlabki ma’lumotlarga ko‘ra, hodisa oqibatida hech kim jabrlanmagan va binoga jiddiy zarar yetmagan.

Ayni paytda mazkur holat yuzasidan tergov harakatlari olib borilmoqda. Mutasaddilar voqeaning sabablari hamda gumonlanuvchining harakatlari ortida qanday maqsad bo‘lganiga aniqlik kiritmoqda.