“Rus mafiyasiga aloqador”. AQSHda rossiyalik yana bir milliarderning aktivlari muzlatildi

AQSHda rossiyalik milliarder va “RUSAL” konserni egasi Oleg Deripaskaning aktivlari muzlatildi. Bu haqda New York Post nashri Amerika Moliya vazirligi amaldorlariga tayangan holda yozmoqda.

Aprel oyida AQSH hukumati milliarder Oleg Deripaskani sanksiyalar roʻyxatiga qoʻshdi. Xususan, Nyu-Yorkdagi Yuqori Ist-Sayd tumanida, shuningdek, Vashingtonda joylashgan qasr muzlatib qoʻyilgan aktivlar orasiga kiritildi.

AQSH rasmiylarining fikricha, Deripaska “rus mafiyasi yetakchilariga”, shuningdek, Kremlga aloqador, deyiladi materialda. Shuningdek, nashrning yozishicha, Deripaska yillar davomida Qoʻshma Shtatlarda moliyaviy firibgarlikda aybdor deb topilgan AQSH prezidentining saylovoldi kampaniyasi sobiq rahbari Pol Manafortga pul toʻlab kelgan. Hozirgi vaqtda Manafort “Rossiya ishi” boʻyicha surishtiruv jarayoniga rahbarlik qilayotgan AQSH maxsus prokurori Robert Myuller jamoasi bilan hamkorlik qilmoqda.

Hozirda AQSH Moliya vazirligining mansabdor shaxslari Deripaska bilan Yevropada aktivlar bilan amaliyotlardan bosh tortish boʻyicha muzokaralar olib bormoqda, deb xabar qiladi NY Post.

Rossiyalik milliarder 2008 yilda koʻchmas mulkni 42,5 million dollarga sotib olgan, deyiladi materialda.

Eslatib oʻtamiz, avvalroq AQSH rossiyalik milliarder Vladimir Yevtushenkovga sanksiya qoʻllamoqchi ekani, u Oʻzbekistonda noqonuniy operatsiyalar amalga oshirgani xabar qilingandi.