Pokiston bosh vaziri Imron Xon lavozimidan chetlatildi

^{Foto: «RIA Novosti»}
Pokiston parlamenti bosh vazir Imron Xonga nisbatan ishonchsizlik votumini qabul qilib, uni lavozimidan chetlatdi. Bu haqda Reuters xabar berdi.

Votumga ovoz berishni 342 deputatdan 174 nafari qoʻllab-quvvatladi — jarayon 13 soatga yaqin davom etdi. Ovoz bergan muxolifatchilar Xonni mamlakatdagi iqtisodiy vaziyatni yaxshilay olmayotganlikda va korruptsiyada aybladi.

Ishonchsizlik votumiga ovoz berish oldidan Pokiston Milliy Assambleyasining (parlament quyi palatasi) spikeri Asad Kayzer iste'foga chiqdi. U buni «Xonni hokimiyatdan olishga qaratilgan chet el fitnasida qatnasha olmasligi» bilan izohlagan. Xonning oʻzi uni olib tashlashga urinishlar ortida AQSh rasmiylari turganini aytgan.

Xon Rossiya bilan yaqin aloqada boʻlgan, deya ta'kidlaydi BBC. Xususan, 24 fevral kuni Rossiyaning Ukrainaga bosqini boshlangan birinchi kunda Pokiston bosh vaziri Moskvada Rossiya prezidenti Vladimir Putin bilan uchrashgan.

Pokiston parlamenti a'zolari bosh vazirga ishonchsizlik votumini 3 aprel kuni oʻtkazmoqchi edi. Biroq oʻshanda parlament vitse-spikeri ovoz berishni oʻtkazishdan bosh tortdi. Kayzer bu konstitutsiyaning 5-moddasiga zid ekanini aytdi.

Parlamentning bosh vazirga ishonchsizlik votumini oʻtkazishga urinishlari boshlangan zahoti prezident Orif Alviy Milliy assambleyani tarqatib yuborgandi.

Bunga javoban muxolifat parlamentni tark etishdan bosh tortayotganliklarini va oʻtirish uyushtirayotganini e'lon qildi. 7 aprel kuni Pokiston Oliy sudi Milliy assambleyani tarqatib yuborish va mamlakat bosh vaziriga ishonchsizlik votumini bekor qilishni «konstitutsiyaga zid» deb topdi va ovoz berishni 9 aprel kuni oʻtkazishga qaror qildi.

Reuters xabariga koʻra, «Pokiston musulmon ligasi» partiyasining etakchisi Shahboz Sharif Pokistonning yangi bosh vaziri boʻlishi mumkin. U ilgari uch marta mamlakat bosh vaziri boʻlgan siyosatchi Navoz Sharifning ukasidir. “Zamin” yangiliklarini “Telegram”da kuzatib boring