Sifatli go‘shtni qanday tanlash bo‘yicha mutaxassis tushuntirish berdi

O‘zbekistonda aholi ko‘p iste’mol qiladigan mahsulotlardan biri go‘sht va go‘sht mahsulotlaridir. Yangi yil arafasida iste’molchilarda go‘shtga talab bir necha barobarga ortadi. «Daryo» muxbiri Hayvonlar kasalliklari tashxisi va oziq-ovqat mahsulotlari xavfsizligi davlat ilmiy markazi direktori Bahriddin Tongyoriqovdan sifatli go‘shtni qanday farqlash yuzasidan izoh oldi.

Mutaxassisning ta’kidlashicha, har bir iste’molchi, avvalo, o‘zi iste’mol qilayotgan mahsulotning kelib chiqishini bilishi kerak.

«Birinchi navbatda, mahsulotni turg‘un savdo shoxobchalaridan olish lozim. Kelib chiqishi noma’lum bo‘lgan go‘sht mahsulotlarini olmaslikni tavsiya qilaman. Shuningdek, sotib olinayotgan go‘sht va go‘sht mahsulotlari, albatta, veterinariya sanitariya ekspertizasidan o‘tkazilgan bo‘lishi shart. Bu hayvonlar maxsus belgilangan joylarda so‘yilgani, tekshiruvdan o‘tkazilgani va eng muhimi sifati kafolatlanganini ko‘rsatadi», — dedi Bahriddin Tongyoriqov.

Markaz rahbarining alohida ta’kidlashicha, go‘shtning yaroqsizligining birinchi belgisi yaxshi qonsizlanmagan bo‘ladi.

«Agar hayvon kasal yoki oxirgi o‘lim holatida so‘yilgan bo‘lsa, uning go‘shti, albatta, u qora rangda bo‘ladi. Go‘shtga toza ro‘molcha yoki qog‘oz sochiq tekkazib ko‘rilganda tekkazilgan narsada qon bo‘ladi. Yaxshi qonsizlanmagan go‘sht tez buziladi. Yana ham aniqlik kiritish kerak bo‘lsa, so‘yilgan hayvonning ichki a’zolari: o‘pka, jigar va talog‘iga e’tibor berish kerak. Masalan, talog‘i bosib ko‘rilganda laxta qon chiqsa bu go‘sht sifatsiz bo‘lishi ehtimoli yuqori bo‘ladi», — dedi mutaxassis. “Zamin” yangiliklarini “Twitter”da kuzatib boring