Qon bosimini tushiruvchi kaliyga boy mahsulot — mayizning foydali xususiyatlari

^{Foto: Life Nut}
Statistik ma’lumotlarga ko‘ra, dunyodagi o‘limlarning asosiy sabablaridan biri yurak-qon tomir kasalliklari hisoblanadi. Ularning aksariyati o‘z vaqtida e’tibor berilmagan va davolanmagan yuqori qon bosimidan kelib chiqadi.

Qon bosimi ba’zan oshib turadigan insonlar doim ham kimyoviy preparatlar bilan davolanishi shart emas. Tabiat in’om etgan tabiiy mahsulotlar orasida uzum qoqisi — mayiz qon bosimini normallashtirish xususiyatiga ega. Mayiz kaliyga boy mahsulot bo‘lib, bir oz oshgan arterial qon bosimini tushirishga yordam beradi.

Agar jismoniy mashqlarni kanda qilmaslik, spirtli ichimliklarni cheklash, chekishni tashlash va yaxshi uxlash kabi sog‘lom turmush tarziga rioya qilsangiz, shifokor ko‘rsatmasiga binoan qon bosimini kundalik mahsulotlar yordamida me’yorda saqlab turish imkoniyati mavjud.

^{Foto: Alamy}
Shuningdek, tarkibida natriy miqdori ko‘p bo‘lgan mahsulotlarni cheklash va kaliyga boy oziq-ovqatlarni iste’mol qilish yurak va qon tomir faoliyatiga ijobiy ta’sir etadi.

2022 yilda European Heart Journal nashrida chop etilgan tadqiqot shuni ko‘rsatdiki, kaliyga boy mahsulotlar (jumladan mayiz)ni ko‘proq iste’mol qilgan bemorlarda qon bosimi me’yorda va yurak xastaliklari xavfi esa kam bo‘ladi.

Agar siz mayizni yaxshi ko‘rmasangiz, qon bosimingizni nazorat qilishga yordam beradigan boshqa kaliy tarkibli oziq-ovqatlar mavjud. Ularga banan, marakuyya, avokado, turli sabzavotlar, dukkaklilar va sut mahsulotlari kiradi. “Zamin” yangiliklarini “Youtube”da kuzatib boring