Gollandiyaning Amsterdam universiteti olimlari farzandlar va ota-onalar o‘rtasidagi yaqinlikni oshirish bo‘yicha qiziqarli tadqiqot o‘tkazdi. Ular maxsus tuzilgan savollar orqali qisqa suhbatlar bolalarning o‘zlarini ko‘proq sevilgan va qadrlangan his etishlariga yordam berishini aniqladi. Mutaxassislarning fikricha, bu usul oilaviy muhitni mustahkamlashda muhim ahamiyatga ega.
Tadqiqotda 8–13 yoshdagi bolalar va ularning ota-onalari ishtirok etdi. Ota-onalardan farzandlariga “Qayerga sayohat qilishni xohlaysan?”, “Hayotingdagi eng g‘alati voqea?” kabi savollar berish so‘raldi. Suhbat atigi to‘qqiz daqiqa davom etdi, biroq natijada bolalar o‘zlarini oldingiga nisbatan ko‘proq mehr va e’tibor ostida ekanini his qildi.
Olimlar bu holatni “ochiqlik orqali yaqinlik” deb ataydi. Ya’ni inson o‘z fikr va his-tuyg‘ularini boshqalar bilan bo‘lishganida, ular o‘rtasida ishonch va samimiyat kuchayadi. Shuning uchun ota-onalarning farzandlari bilan shunday savollar asosida suhbat qurishi bolada o‘zini tinglanayotgan va qadrlanayotganini his ettiradi.
Mutaxassislar kuzatuv jarayonida ko‘plab oilalar ilgari bu kabi chuqur mavzular haqida suhbatlashmaganini aniqladi. Odatda ota-onalar farzandlar bilan faqat o‘qish, o‘yin yoki kundalik mavzularni muhokama qiladi. Ammo shunday samimiy suhbatlar orqali ular bolalarning ichki dunyosini yaxshiroq tushunishi mumkin.
“Zamin”ni Telegramʻda oʻqing!
