Raqamli so‘m muomalaga chiqariladimi? Markaziy bank raisi muhim qadamni e’lon qildi

Raqamli so‘m sari ilk qadam: O‘zbekistonda milliy raqamli valyuta konsepsiyasi e’lon qilinmoqda!

Poytaxtdagi Central Asia Expo Uzbekistan majmuasida boshlangan Markaziy Osiyodagi eng yirik moliyaviy tadbir — Silk Road Finance&Technology Forum-2026 doirasida Markaziy bank tomonidan O‘zbekistonning raqamli valyutasi (CBDC) bo‘yicha maxsus konseptual hujjat taqdim etilmoqda.

Markaziy bank raisi Timur Ishmetovning ta’kidlashicha, gap hozircha raqamli valyutani to‘liq muomalaga chiqarish haqida emas, balki uning barcha imkoniyatlarini sinchkovlik bilan o‘rganish va pilot tajriba-sinov bosqichini boshlash haqida ketmoqda.

CBDC konsepsiyasi: Raqamli milliy valyuta nima beradi?

Markaziy bank e’lon qilayotgan maxsus konseptual hujjat quyidagi muhim yo‘nalishlarni baholaydi:

• Dizayn va yechimlar: Raqamli valyutaning arxitektura variantlari, afzalliklari va cheklovlari;

• Moliyaviy ta’sir: Tizimning barqarorligi va moliya tizimi uchun yuzaga kelishi mumkin bo‘lgan oqibatlar;

• Pilot bosqichi: Tajriba-sinovlar orqali raqamli valyutaning innovatsiyalar va milliy raqamli iqtisodiyotni qo‘llab-quvvatlashdagi optimal modeli sinovdan o‘tkaziladi.

FinTech tarmog‘iga 1 mlrd dollar va 5 ming yangi mutaxassis

Prezident tomonidan qo‘yilgan vazifalar doirasida O‘zbekiston birinchi milliy FinTech strategiyasini ishlab chiqdi va sohani yangi bosqichga olib chiqmoqda:

• Investitsiya ko‘lami: 2030 yilga qadar moliyaviy texnologiyalar sohasiga 1 milliard dollar to‘g‘ridan to‘g‘ri xorijiy investitsiya jalb etish maqsad qilingan;

• Kadrlar tayyorlash: 5 ming nafar yosh FinTech mutaxassisi o‘qitiladi. Dastlabki guruh Singapur universitetlari va GFTN bilan hamkorlikda ishlab chiqilgan dastur asosida joriy yil oxirigacha ta’limni boshlaydi;

• Naqdsiz hisob-kitoblar: Bugungi kunda O‘zbekistonda to‘lovlarning 57 foizi naqdsiz shaklda amalga oshirilmoqda va bu ko‘rsatkich muttasil oshib bormoqda;

• Venchur kapital: 2025 yil yakunlariga ko‘ra, Markaziy Osiyo bo‘ylab venchur moliyalashtirish hajmi qariyb 320 million dollarni tashkil etgan.

Toshkent — Markaziy Osiyoning moliyaviy markazi: Forum kun tartibi

24–26 avgust kunlari CAeX majmuasida o‘tkazilayotgan xalqaro forum O‘zbekiston Markaziy banki va Global Finance and Technology Network (GFTN) hamkorligida tashkil etilgan bo‘lib, 4 mingga yaqin ishtirokchini (30 foizi xorijiy ekspertlar) jamladi:

• Muhokama mavzulari: Transchegaraviy to‘lovlar, Ochiq banking (Open Banking), raqamli identifikatsiya, steyblkoinlar, CBDC va tokenlashtirilgan real aktivlar;

• Islomiy raqamli iqtisodiyot: Forumning uchinchi kuni — 26 avgustda tadbir Islom sivilizatsiyasi markazida davom etib, Azimuth maxsus dasturi doirasida islomiy moliya va raqamli yechimlar muhokama qilinadi.