Ziroat Mirziyoeva Namangan viloyatining 46-son ixtisoslashtirilgan maktab-internatidagi bolalar bilan uchrashib, samimiy suhbatlashdi va ular bilan birga muvaffaqiyatlar shodligini baham koʻrdi.
«Zamin» fondining koʻmagi bilan maktabning barcha oʻquvchilari tashxisdan oʻtkazilib, ularga eshitishni protezlash amaliyoti bajarildi. Shuningdek, maktab zamonaviy assistiv uskunalar bilan ta'minlandi, informatika sinfi jihozlandi, robototexnika toʻplamlari yetkazildi. Informatika oʻqituvchilari maxsus metodologiya asosida oʻqitildi.
«Zamin Education» loyihasi doirasida «Zamin» fondi va «Digital Generation Uzbekistan» NNM «Raqamli Avlod Qizlari – 2023» respublika inklyuziv IT-oromgohini oʻtkazdilar.
Tadbirda 72 nafar qiz ishtirok etdi. Ular uch kun davomida grafik va raqamli dizayn, veb-dasturlash boʻyicha bilimlarini oshirdilar va tanlov dasturlarida qatnashdilar. Soʻng oʻz loyihalarini tanlovga taqdim etdilar.
IT-oromgoh ishtirokchilari mehmonlarga oʻz natijalari va yangi loyihalari haqida hikoya qilib berdilar.
Tanlovning «Digital Art» yoʻnalishidagi gʻoliblar orasida 46-son ixtisoslashtirilgan maktabdan Usmonova Malika ham bor edi.
“Zamin” yangiliklarini “Telegram”da kuzatib boring
