Ibrohimjon Asqarov
Foto: “Daryo”
Ko‘p hollarda ijtimoiy tarmoqlarda magnit bo‘roni va undan ehtiyot bo‘lish haqida xabarlar tarqalib turadi. Unda magnit bo‘roni indeksi 6 ballga chiqishi kutilayotgani, bu sharoitda sport bilan shug‘ullanish, og‘ir mehnat qilish, spirtli ichimliklar, qahva ichish hamda sho‘r mahsulotlar iste’mol qilish mumkin emas, degan tavsiyalar aytiladi.
O‘zbekiston tibbiy-ilmiy faoliyat bilan shug‘ullanuvchilar tabobat akademiyasi raisi, professor Ibrohimjon Asqarov magnit bo‘roni va uning inson organizmiga qay darajada ta’siri haqida mulohazalarini bildirib o‘tdi.
“Magnit bo‘roni bor narsa, organizmga ta’sir qiladi. Lekin vahima qilmaslik kerak. Magnit bo‘roni haqidagi xabarlarni o‘qigandan keyin odam kasal bo‘lib qoladi. Magnit bo‘roni bo‘lyapti, yuragim o‘ynayapti, deb borib yotib oladi. O‘z vaqtida ovqatlanib, ishda davom etish mumkin.
Shaxsiy fikrim, bu narsa bor, lekin organizmni ozgina ehtiyot qilib turilsa, kifoya. Ortiqcha vahimaga o‘rin yo‘q”, — dedi Ibrohimjon Asqarov.
Oliy toifali shifokor Ra’no Nosirovaga ko‘ra, Yerning magnit maydoni ta’siri odatda insonlarga sezilmaydi. Biroq ba’zan ushbu maydonda ayrim odamlar his etishi mumkin bo‘lgan tebranishlar kuzatiladi. Buning asosiy sababchisi Quyoshdir.
Ya’ni odatda uning faolligi kuzatilganda sayyorani magnit bo‘ronlari qoplaydi. Bu esa surunkali xastaliklarga chalingan insonlar salomatligiga salbiy ta’sir etishi mumkin. Ayniqsa, yurak-qon tomir, asab tizimi kasalliklari, qandli diabet va bronxial astma bilan og‘riyotgan bemorlar bu o‘zgarishlarni ko‘proq his etadi.
“Zamin” yangiliklarini “Telegram”da kuzatib boring
