O‘zbekistonda halok bo‘lganlar nomidan firibgarlik avj oldi

So‘nggi oylarda ijtimoiy tarmoqlarda xorijda vafot etgan o‘zbekistonliklarni yurtga qaytarish uchun yordam so‘rab pul yig‘ilishi haqidagi xabarlar ko‘paydi, deb xabar berdi UPL.uz. Tashqi mehnat migratsiyasi agentligi fuqarolarni ogohlantirib, bu chaqiriqlar ortida firibgarlar turishi mumkinligini ma’lum qildi.

Agentlikning qayd etishicha, davlat xorijda vafot etgan fuqarolarning jasadini O‘zbekistonga qaytarish bilan bog‘liq barcha xarajatlarni o‘z zimmasiga oladi. Shu sababli, fuqarolarga shubhali hisob raqamlarga pul yubormaslik tavsiya etiladi.

Firibgarlar eski yoki soxta ma’lumotlardan foydalanib, odamlarning hissiyotlariga ta’sir qilishga urinishmoqda. Ular karta raqamlarini ko‘rsatib, soxta xayriya so‘rashadi.

Bunday holatlarda fuqarolarga rasmiy manbalar orqali axborotni tekshirish tavsiya qilinadi. Agar xorijda vafot etgan qarindoshi bo‘yicha ma’lumot kerak bo‘lsa, Tashqi mehnat migratsiyasi agentligiga murojaat qilish mumkin: (71) 202-33-55 yoki 1282 qisqa raqamlar, shuningdek, @huquqiy_yordam_uzbot Telegram-boti orqali murojaat qilish mumkin.

Agentlik ilgari Turkiyada yong‘inda halok bo‘lgan 19 yoshli yigit jasadining davlat tomonidan yurtga qaytarilganini misol sifatida eslatdi. Bu hukumat yordam tizimi mavjud va samarali ishlayotganini ko‘rsatadi.