O‘zbekistonlik migrantlarni ro‘yxatdan o‘tkazish uchun Rossiyaning “Gosuslugi” portalini buzdi

Rossiyaning Bashqirdiston Respublikasidagi Sterlitamak shahrida O‘zbekiston fuqarosi A.R. qo‘lga olindi, deb upl.uz manbasi Baza xabar berdi.

U vatandoshlarini Rossiyada noqonuniy ro‘yxatdan o‘tkazish bilan shug‘ullanganlikda gumon qilinmoqda. Tergovga ko‘ra, u “Gosuslugi” portalidagi rossiyaliklarning shaxsiy kabinetlariga ruxsatsiz kirib, ularning manzillaridan foydalanib chet elliklarni ro‘yxatdan o‘tkazgan.

Uy egalari esa bu holatdan bexabar bo‘lgan. A.R. bu xizmat evaziga pul olgan va 10 dan ortiq kishini noqonuniy ro‘yxatdan o‘tkazgan.

Tergov boshlanganda u allaqachon Rossiyani tark etgan edi, biroq yaqin kunlarda qaytib kelib, faoliyatini davom ettirmoqchi bo‘lgan. U Moskvaga uchib, so‘ng Minskka ketishni rejalashtirgan, ammo Sterlitamakda ushlanib, Ufa shahriga olib ketilgan.

Unga nisbatan “soxta ro‘yxatga qo‘shish” moddasi bo‘yicha jinoyat ishi ochilgan. Hozirda u uy qamog‘ida, lekin tergovchilarning so‘roviga binoan qamoqqa olish ehtimoli mavjud.

“Zamin”ni Telegramʻda oʻqing!